विराटनगर–  माेरङ उर्लावारीका सनम शाक्य हत्या र साढे ३३ किलो सुन तस्करीमा संलग्न रहेको आरोपमा पुर्पक्षको लागि जेल चलान भएका प्रहरी अधिकृतहरुको उच्च अदालत विराटनगरमा सुनुवाइ शुरु भएको छ । उच्च अदालत बिराटनगरले सुन तस्करी तथा सनम शाक्यको हत्याको सम्बन्धमा मुलुकी ऐन अ.बं.१७ नम्बर प्रयोग गर्दै निबेदन निएका प्रहरी अधिकृतहरुको सुनुवाइ शुरु गरेको हो ।

यसअघि जिल्ला अदालत मोरङबाट सफाइ पाएका एकजना प्रहरी हवल्दार र  धरौटीमा छुटेका निलम्बित एसएसपी श्याम खत्रीका चालकलाई पुर्पक्षको लागि जेल हाल्ने निर्णय बाहेकका सबै निवेदन उपर सुनुवाइ हुँदै गर्दा जिल्ला अदालतको आदेश सदर भएको छ । 

बिहीवारदेखि सुनुवाइ शुरु भएको प्रहरी अधिकृतको पहिलो आदेशमा निलम्बित डिएसपी सञ्जय बहादुर राउत परेका छन्  । उनलाई पनि जिल्ला अदालतले गरेको निर्णय सदर गर्दै थुनामा राखेर अनुसन्धान गर्न भनिएको छ । उच्च अदालतका न्यायाधिश थिर बहादुर कार्की र हरिप्रसाद भण्डारीको संयुक्त इजलाशले  सो आदेश गरेको हो ।

आदेशमा भनिएको छ, मोहन काफ्लेको घरबाट बरामद भएको रजिष्टरमा  उल्लेखित संजय मामा भन्ने ब्यक्ति यिनै संजय राउन हुन  भनी सहप्रतिवादी बिष्णुबहादुर खड्काले लेखिदिएको, उक्त रजिष्टरबाट १२ लाख संजयबहादुर राउतले लिएको भन्ने उल्लेख भएको समेतका तत्काल प्राप्त प्रमाणका  आधारपछि बुझ्दै जाँदा ठहरे बमोजिम हुनेगरी यी निवेदकलाई मुद्दा पुर्पक्षका लागि  थुनामा राख्नु पर्ने अबस्था देखिन आयो । अत:  यी निवेदकलाई मुद्दा पुर्पक्षको लागि थुनामा राख्ने भनी जिल्ला अदालत मोरङबाट मिति २०७५/२/८ मा भएको  आदेशलाई बेरितको नदेखिँदा केही परिवर्तन गरिरहन परेन । 

आदेश पछि संजय राउतसँगै अब अन्य अधिकारीहरुको सुनुवाइ के हुने हो भन्ने चासोको बिषय बनेको छ । सुनकाण्डसम्बन्धी मुद्दाहरुमध्ये निबेदकको तर्फबाट दिईएको निबेदनमा २५ जनाको सुनुवाइका लागि विहीवार उच्च अदालतका बिभिन्न इजलाशमा पेशी चढेको थियो ।  

पेशी चढेकामध्ये ४ जनाको पेशी स्थगित भएको थियो भने २० वटा मुद्दा हेर्न नभ्याएको अदालतका शाखा अधिकृत राजु प्रसाद दाहालले जानकारी दिए ।  हेर्न नभ्याएकाहरुको पेशी शुक्रवारकाे इजलाशमा समेत हेरिने भएको छ । शुक्रवारदेखि थप निलम्बित प्रहरी अधिकृतहरुको हकमा सुनुवाइ हुनसक्ने अनुमान गरिएको छ ।