आर्थिक अभावमा हाते कागज उद्योग बन्द, बैंक तथा वित्तीय संस्थाले दिन मानेनन् ऋण

भदौ २९, २०७५

सुर्खेत-आर्थिक अभावका कारण दैलेख गुराँस गाउँपालिका ७ ओखरेनीमा रहेको हाते कागज उद्योग बन्द भएको छ । गाउँपालिकामा रहेको एकमात्र उक्त उद्योग आर्थिक अभावका कारण बन्द भएको सञ्चालक प्रेम बहादुर रामजालीले बताए ।

‘नेपाली हातेकागज बनाउन आवश्यक पर्ने प्रमुख कच्चा पदार्थको रुपमा रहेको लोक्ता प्रसस्त हुँदाहुदै आर्थिक अभावमा कागज उद्योग बन्द गर्न बाध्य भएँ ।’ प्रेम नेपाली हाते कागज उद्योगका सञ्चालक रामजालीले भने, ‘कतैबाट आर्थिक सहायता पाएको खण्डमा पुनः उक्त उद्योगलाई सञ्चालन गर्ने थिएँ ।’


आर्थिक अभावका कारण केही बर्षदेखि उद्योग बन्द गर्नुपरेको उनले बताए ।

२०४९ सालमा उद्योगको रुपमा दर्ता गराएका रामजालीले बैंक तथा वित्तीय संस्थामा ऋणका लागि गुहारेपनि कसैले केही सहायता गर्न नसकेको बताए ।

‘ लोनमा रकम पाइने आशामा धेरै ठाउँ धाएँ ’ लोकान्तरसँग उनले दुखेसो पोख्दै भने, ‘जग्गाको लालपूर्जा देखाउदा समेत ऋण पाउन सकिएन ।’

उनले गरिब, निमुखाहरुसँग थोरै मात्र जग्गा हुने र उनीहरुको लालपुर्जा धरौटीमा बैंक तथा वित्तीय संस्थाहरु लिनै नमान्ने गरेको गुनासो सुनाए । ‘मैले कागज उद्योग पुनःसंचालनको लागि लोन लिन बैंकमा, कृषि कार्यालयमा गए, तर मलाई लोन दिइएन  उनले थपे ‘अहिले पनि उद्योग बन्द छ तर मैले दर्ता नविकरण गरिरहेको छु, र कर पनि तिरिरहेको छु ।’

उनले व्यवसाय संचालन गर्छु भन्ने व्यक्तीलाई प्रोत्साहन नदिने सकार र विभिन्न गैर सरकारी संस्थाहरुदेखि वाक्क लागेको बताए । ‘जहाँ पनि पहुँचको कुरा हुँदो रहेछ ’ उनले भने, ‘जसले काम गर्न चाहन्छ उसलाई सहायता गर्ने कमै रहेछन ।’

यो कागज उद्योग संचालनका बेला १६ जनाले प्रत्यक्ष रुपमा रोजगारी पाएका थिए । तर अहिले बन्द भएपछि आफुहरु वेरोजगार बस्नुपरेको उद्योगमा काम गर्ने कर्मचारीहरु बताउँछन । उतिबेला रोजगारी पाएका स्थानीय रत्न बहादुर घर्तीले कागज उद्योग संचालन भइरहदा कमाई गर्न सजिलो भएको भन्दै अहिले बन्द हुदा समस्या भएको बताए ।

उनले कागज उद्योग संचालन भए धरै नाफा हुने भन्दै यसको संचालनको लागि आवश्यक पहल हुनुपर्नेमा जोड दिए । यता, गुराँस गाउँपालिकाका अध्यक्ष खेमराज वलीले सम्वन्धित व्यक्ति वा उद्योगका कर्मचारीहरु गाउँपालिकाको सम्पर्कमा नआएको बताए ।

‘हामीले गुराँसलाई समृद्ध बनाउने सपना बोकेर अघि बढेका छौं ।’ उनले भने, ‘त्यस्ता काम गर्न चाहनेहरुलाई गुराँस गाउँपालिका प्रोत्साहन गर्न तयार छ ।’ उनले गाउँपालिकाले नियमानुसार के कति गर्न सक्छ उद्योग सञ्चालनका लागि, त्यो गर्न तयार रहेको जनाए ।

भदौ २९, २०७५ मा प्रकाशित

शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस