काठमाडौं – कञ्चनपुरकी बालिका निर्मला पन्त हत्याकाण्ड छानबिन सम्बन्धमा गृहमन्त्री रामबहादुर थापा ‘बादल’ले प्रतिनिधिसभा बैठकमा गोलमटोल जवाफ दिएको सांसदले आरोप लगाएका छन् ।

बिहीवारको बैठकमा नेपाली कांग्रेसका सांसद दिलेन्द्रप्रसाद बडूले घटनाबारे सरकारको जवाफ मागेपछि शुक्रवार गृहमन्त्रीले जवाफ दिएका हुन् ।

तर, गृहमन्त्रीको जवाफ गोलमटोल भएको भन्दै सांसदहरूले असन्तुष्टि जनाएका छन् ।

संसदमा जवाफ दिँदै गृहमन्त्री थापाले नागरिक स्तरबाट गम्भीर आवाज उठेपछि भदौ ७ गते उच्चस्तरीय छानबिन समिति बनेको, समितिले काम गरिरहेकै बेला पुनः भएको विरोध ध्वंशात्मक भई सरकारी सम्पत्तिमा क्षति हुने गतिविधि भएपछि रोक्न खोज्दा शनि खुनाको मृत्यु भएको तथा शहीद घोषणा गर्दै मृतक परिवारलाई क्षतिपूर्ति दिएको बताएका छन् ।

घटनाबारे छानबिन तथा विस्तृत अनुसन्धान भइरहेको बताउँदै गृहमन्त्री थापाले दोषीलाई कानूनी कठघरामा ल्याउने, अनुसन्धानमा लापरवाही र गल्ती भए प्रहरीलाई दण्डित गर्ने र अपराध नियन्त्रण गर्न सरकार प्रतिवद्ध रहेको बताए । छानबिन समितिका सदस्य विरेन्द्र केसी सुरक्षाको कारण देखाउँदै समितिबाट अलग भएपनि सरकारले सुरक्षाको प्रत्याभूति गराएपछि समितिमा फर्किएर काम गरिरहेका गृहमन्त्री थापाले बताए ।

थापाको जवाफ सुनेपछि प्रश्नोत्तर समयमा बोल्दै अधिकांश सांसदले गृहमन्त्रीको जवाफ गोलमटोल भएको बताएका छन् । कांग्रेस सांसद तथा पूर्वमन्त्री गगन थापाले प्रधानमन्त्रीले तथ्य तोडमोड गरेर अपराधी जोगाउने र अनुसन्धान प्रभावित हुने गरी दिएको अभिव्यक्तिबारे प्रधानमन्त्रीसँग जवाफ माग्नुभयो कि भएन भनेर प्रश्न गरेका थिए ।

जवाफमा गृहमन्त्री थापाले त्यस्तो अभिव्यक्ति प्रधानमन्त्रीले दिएको आफूलाई थाहा नभएको बताउँदै प्रधानमन्त्रीलाई आफूले जवाफ माग्नेभन्दा पनि प्रधानमन्त्रीले छिटोभन्दा छिटो अपराधी पत्ता लगाउन गम्भीर निर्देशन दिएको बताए ।

सांसद अमरेशकुमार सिंहले छानबिन समितिका सदस्यलाई नै धम्की दिने शक्तिशाली अपराधी को हो भनेर प्रश्न गरेका थिए । जवाफमा गृहमन्त्री थापाले भने, ‘छानबिनका लागि महेन्द्रनगरमा रहेका बेला मोटरसाइकलमा आएको शक्तिशाली देखिने मोटो–मोटो हेर्दाखेरी ठूलै जीउडालको मान्छेले धम्की दिएको रे !’ 

सांसद भरतकुमार शाहले ५० दिनसम्म अपराधी पत्ता नलाग्नु र २५ दिनसम्म अनुसन्धानमा खटिएका एसपीकै डीएनए परीक्षण गर्नुपर्ने अवस्था आउनुभन्दा लज्जास्पद के हुन सक्छ भनेर प्रश्न गरे । उनले भने, ‘अनुसन्धान सही हुन्छ भन्ने विश्वासिलो आधार दिन आग्रह गर्छु ।’

सांसद सञ्जयकुमार गौतमले गृहमन्त्रीको जवाफ गोलमटोल भएको बताउँदै सरकारको लाजमर्दाे कालखण्ड चलिरहेको बताए । ‘संसदीय समिति बनाएर पूर्ण छानबिन गर्नुपर्छ, घटनाको प्रमाण नष्ट गरिनु दुर्भाग्यपूर्ण छ ।’

सांसद रेगमति शाहीले गृहमन्त्रीको जवाफ आएजस्तो नलागेको बताउँदै सोधिन्, ‘हत्यारा पत्ता लगाउन कति वर्ष लाग्छ ?’ सांसद राजेन्द्रप्रसाद लिङदेनले सरकार यत्रो दिनसम्म किन अल्मलिएको भनेर प्रश्न गरे । ‘खास अभियुक्त कसलाई थाहा छ ? प्रारम्भिक अनुसन्धानका क्रममा प्रहरीले जसलाई बचाउन प्रमाण नष्ट गर्यो त्यसैबाट अनुसन्धान शुरू गर्नुपर्छ । अरु कुनै गोलमटोल कुरा गर्नु छैन ।’