स्वास्थ्यकर्मीको लापरवाहीले महिलाको मृत्यु

भदौ २९, २०७५

सुर्खेत-  स्वास्थ्यकर्मीको लापरवाहीका कारण जाजरकोटमा एक महिलाले ज्यान गुमाउनु परेको छ ।

जाजरकोट जिल्लाको छेडागाड नगरपालिका–५ थलह बजारमा रहेको जयलक्ष्मी मेडिकल हलमा उपचारका लागि गएकी सोही नगरपालिका–१० नल्फुकी पञ्चकला नाथको स्वास्थ्यकर्मीको लापरवाहीका कारण मृत्यु भएको आफन्तले आरोप लगाएका छन् ।


ADVERTISEMENT

‘सामान्य ज्वरोको उपचारका लागि उनी त्यहाँस्थित जयलक्ष्मी मेडिकल हलमा गएकी थिइन् ।’ मृतकका छोरा किशोर नाथ योगीले भने, ‘सोही मेडिकलका सञ्चालक तथा उनको उपचारमा संलग्न भएका तिलकबहादुर बोहराले गलत सुई लगाउँदा नाथको मृत्यु भएको हो ।’ उपचारका क्रममा लापरबाही गरेकोले आमाको मृत्यु भएको मृतक पञ्चकलाका छोरा किशोर नाथले बताए ।

घटनापछि मेडिकलका सञ्चालक बोहोरालाइ प्रहरीले पक्राउ गरेको छ । मृतक पञ्चकलाको पोष्टमार्टमका लागि जिल्ला अस्पताल जाजरकोटमा लिन लागिएको प्रहरी निरीक्षक लोकबहादुर विष्टले जानकारी दिए । घटनाको बारेमा थप अनुसन्धान शुरु गरिएको प्रहरीले जनाएको छ ।

सुर्खेतस्थित ‘जयलक्ष्मी मेडिको फर्म’को नामबाट बोहराले थलह बजारमा मेडिकल सञ्चालन गर्दै आएका छन् । मेडिकल सञ्चालनका लागि फार्मेसी अध्ययनसहित मेडिकल काउन्सिलबाट प्रमाणपत्र लिनु पर्ने प्रावधान छ । तर, उनले अर्कोको नामबाट २०५४ सालदेखि अवैध रुपमा मेडिकल संचालन गर्दै आएका थिए ।

मेडिकल सञ्चालक बोहरालाई आवश्यक अनुसन्धानका लागि पक्राउ गरेर जिल्ला सदरमुकाम लिइने प्रहरी निरीक्षक विष्टले बताए । स्थानीय प्रशासले गत वर्ष गरेको अनुगमनका क्रममा बोहोराले आफूले सञ्चालन गरेको मेडिकल अवैध भएको स्वीकार गर्दै बन्द गर्ने कागज गरेका थिए । मृतकका आफन्तले बोहोरालाई कारवाही तथा क्षतिपुर्तीको माग गर्दै प्रर्दशन समेत गरेका छन् ।

भदौ २९, २०७५ मा प्रकाशित

प्रतिक्रिया दिनुहोस