सुर्खेत – जिल्ला प्रहरी कार्यालय सुर्खेतले नियन्त्रणमा लिएको अवैध मदिरामा मोजाको प्रयोग भएको पाइएको छ ।

दशैं र तिहारलाई मध्यनजर गर्दै अवैध मदिरा नियन्त्रण अभियानको पहिलो दिन शनिवार मदिरा बनाउने कच्चा पदार्थमा मोजा, चुरा, कपडा, अन्य फोहोर, खान अयोग्य हुने वस्तुको प्रयोग भएको पाइएको हो ।

‘अत्यन्तै फोहोर, जो कल्पनासम्म गर्न सकिँदैन, त्यस्ता वस्तुको प्रयोग भएको हामीले पाएका छौं,’ जिल्ला प्रहरी कार्यालय सुर्खेतका प्रहरी उपरीक्षक वसन्त रजौरेले भने, ‘अवैध मदिरा बनाउनेले जनताको जीवनमाथि खेलवाड गरिरहेको पाइएको छ ।’ 

एसपी रजौरेका अनुसार जिल्ला प्रहरी कार्यालय सुर्खेतले शनिवार झुप्रा क्षेत्र र मंगलगढी क्षेत्रमा अप्रेसन गरेको थियो । अप्रेसनका क्रममा प्रहरीले कच्चा पदार्थ २ हजार लिटर, अवैध मदिरा ३ सय ५० लिटर र ८ सेट मदिरा तयार पार्ने भाँडा नियन्त्रणमा लिएर नष्ट गरेको छ ।

डीएसपी रजौरेका अनुसार नजिकै आउँदै गरेको दशैं तथा तिहार लगायतका पर्वलाई शान्तिपूर्ण बनाउन अवैध मदिरा नियन्त्रण अभियान थालनी गरेको बताउन् । ‘समाजमा सबैभन्दा बढी विवाद गराउने, झैझगडा हुने र दुर्घटना हुने भएका कारण हामीले अवैध मदिरालाई नियन्त्रण गर्ने अभियान शुरू गरेका हौं,’ मदिरा नियन्त्रण अभियानबारे जानकारी दिँदै एसपी रजौरेले भने, ‘हाम्रो यो अभियानलाई सफल पार्न सबैबाट सहयोग पाउने प्रहरीको अपेक्षा छ ।’

उनले अब वीरेन्द्रनगरमा अवैध मदिरा बिक्रीवितरण गर्ने र उत्पादन गर्नेले पैसा दिएर बच्ने सम्भावना नभएको बताए । ‘कसैले पैसा दिएर म बच्छु भन्ने सोच्छ भने त्यो दुर्भाग्यपूर्ण हुनेछ उसका लागि,’ उनले भने, ‘शान्ति सुव्यवस्थामा कसैसँग कहिल्यै सम्झौता गरिने छैन ।’ उनले राम्रो काम गरेको खण्डमा पुरस्कार र गलत गरेको खण्डमा सजाय दिन प्रहरी तयार रहेको बताए ।