काठमाडौं – प्रतिनिधिसभा अन्तर्गतका समितिको सभापति चयनका लागि शुक्रवार निर्वाचन हुनेभएको छ ।

संसद सचिवालयले समितिको सभापतिका लागि बिहीवार उम्मेदवारी दर्ता गराउने गरी निर्वाचन कार्यक्रम प्रकाशित गरेको छ ।

शुक्रवार ११ बजे एकैपटक सबै समितिको सभापति चयनका लागि निर्वाचन हुनेछ ।

संसदीय समिति सभापति बन्न सत्तारुढ नेकपाभित्र सांसदहरूको दौडधूप छ ।

मन्त्री बन्ने चर्चा भएर पनि अवसर नपाएकाहरूलाई समितिको सभापति बनाउने नेकपाको तयारी छ ।

समितिको सभापति बनाउनका लागि सोमवारको संसद बैठकमा सदस्यहरूको हेरफेर गरिएको थियो । 

प्रमुख प्रतिपक्षी दल नेपाली कांग्रेसलाई एक र सत्ता साझेदार संघीय समाजवादी फोरमलाई एक सभापति दिएर बाँकी समिति आफैंले राख्ने नेकपाको तयारी छ । 

प्रतिनिधिसभाको अर्थ समितिमा पूर्वअर्थमन्त्री सुरेन्द्र पाण्डे तथा घनश्याम भुसालको नाम चर्चामा छ ।

अन्तर्राष्ट्रिय सम्बन्ध समितिमा पवित्रा निरौला खरेलको सम्भावना रहेको नेकपा स्रोतले बतायो । यसअघि हिजो मात्र उनलाई महिला बालबालिका समितिबाट अन्तर्राष्ट्रिय सम्बन्ध समितिमा सारिएको थियो । पूर्वमन्त्री अग्नि सापकोटा पनि सभापति बन्ने चर्चा नेकपाभित्र छ ।

कानून, न्याय तथा मानव अधिकार समितिमा चितवनबाट लगातार दुईपटक निर्वाचित सांसद कृष्णभक्त पोखरेल सभापति बन्ने लगभग निश्चित भएको छ ।

कृषि सहकारी तथा प्राकृतिक स्रोत समितिमा पूर्वमन्त्री महेश बस्नेतदेखि पूर्वउपसभामुख पूर्णकुमारी सुवेदीसम्मको नाम चर्चामा छ ।

बस्नेतलाई हिजो मात्र अर्थ समितिबाट प्राकृतिक स्रोत साधन समितिमा सारिएको थियो । 

महिला तथा सामाजिक समितिमा निरु पाल सभापति बन्ने सम्भावना रहेको नेकपा स्रोतले बतायो । पाल नबनेको अवस्थामा अमृता थापा पनि सभापति बन्ने सम्भावना छ ।

यसअघि अन्तर्राष्ट्रिय सम्बन्ध समितिमा रहेकी पाललाई हिजो मात्र महिला समितिमा सारिएको थियो । 

राज्य व्यवस्था तथा सुशासन समितिमा कृष्णगोपाल श्रेष्ठदेखि शशी श्रेष्ठसम्मको नाम चर्चामा छ । जनमोर्चा, माओवादी हुँदै नेकपाको नेत्री बनेकी शशी श्रेष्ठलाई राज्य व्यवस्था समितिको सभापति बनाउन पूर्वमाओवादी नेताहरूले लबिङ गरिरहेका छन् । 

विकास तथा प्रविधि समितिमा गणेश पहाडी र यज्ञराज सुनुवारको नाम चर्चामा छ । दुवै नेता पछिल्ला दुई निर्वाचनमा लगातार प्रत्यक्ष निर्वाचित भएपनि मन्त्री र सभापति बन्न पाएका छैनन् ।

शिक्षा तथा स्वास्थ्य समितिमा पूर्वमन्त्री खगराज अधिकारीको नाम चर्चामा छ । 

नेकपाभित्र कैलालीबाट आरजु देउवा राणालाई पराजित गरेका नारदमुनि राना थारु, जयपुरी घर्ती लगायतको नाम संसदीय पनि चर्चामा छ । 

उद्योग तथा वाणिज्य र श्रम तथा उपभोक्ता हित समितिमा फोरमका विमल श्रीवास्तव सभापति बन्ने लगभग निश्चित भएको छ ।

राष्ट्रिय सभामा एउटा समितिको सभापति पाएको कांग्रेसले प्रतिनिधि सभामा सार्वजनिक लेखा समितिको सभापति पाउँदैछ ।

संसदको सार्वजनिक लेखा समिति प्रतिपक्षी दललाई दिने संसदीय परम्परा रहेको छ । 

कांग्रेसले भरत शाहलाई लेखा समितिको सभापति बनाउने तयारी गरेको छ । शाह पछिल्ला दुई निर्वाचनमा लगातार विजयी भएका थिए । 

यसअघि भदौ ५ गते हुने भनिएको समिति सभापतिको निर्वाचन भदौ १७ गतेसम्मका लागि स्थगित भएको थियो ।

प्रतिनिधि सभाको साउन १७ गते बसेको बैठकले संसदीय समितिको गठन गरेको थियो । 

सभापति नहुँदा जेष्ठ सदस्यले बैठकको अध्यक्षता ग्रहण गरेका थिए । संसदीय समितिको सभापतिको सुविधा राज्यमन्त्रीसरह व्यवस्था गरिएको छ ।