काठमाडौं — रुसले सिरियामा आफ्नो एक सैन्य विमान खसाइएको र त्यसमा रहेका १५ सैनिकको मृत्युमा इजरायल दोषी रहेको बताएको छ । 

रुसको रक्षा मन्त्रालयले इजरायली जेटहरूले इल–२० विमानलाई सोमवार सिरियाली हवाई रक्षाको बाटोतर्फ जान बाध्य बनाएको बतायो । मस्कोलाई सिरियाली लक्ष्यमाथिको आक्रमणका लागि पर्याप्त चेतावनी नदिइएको पनि उसले बतायो । 

इल–२० विमान स्थानीय समयअनुसार राति ११ बजे राडारबाट हराएको थियो । 

इजरायलले यो आरोपको जवाफ दिन बाँकी छ । 

इजरायलले सिरियामा आक्रमण गरेको कमै मात्र स्वीकार गर्छ तर एक इजरायली सैन्य अधिकारीले विगत १८ महिनामा सिरियामा रहेका २०० इरानी लक्ष्यमा आक्रमण गरेको हालै बताएका थिए । 

सिरियामा इरानले सैन्य अड्डा जमाएर बसेको भन्दै इजरायल सरकारले चिन्ता व्यक्त गरेको छ । अनि लेबनानमा रहेको लडाकू समूह हेज्बोल्लाहलाई इरानले हतियार उपलब्ध गराएको पनि उसले आरोप लगाएको छ । हेज्बोल्लाह
सिरियाली सरकारी बलसँग मिलेर लडिरहेको छ ।

सोमवारको घटना सिरियाली तटबाट ३५ किलोमिटर छ भएको बताइएको छ । इल–२० रुसको हमेमिम हवाईअड्डाबाट फर्किरहेको थियो । 

रुसको तास समाचार संस्थाका अनुसार, इल–२० विमानलाई ‘लाटाकिया प्रान्तमा सिरियाली फसिलिटीमा चारवटा इजरायली एफ–१६ जेटले आक्रमण गर्दा हराएको’ लेख्यो । 

मंगलवार रुसको रक्षा मन्त्रालयले उक्त विमानलाई सिरियाले खसाएको बतायो ।

तर यसका लागि इजरायलका गैरजिम्मेवार कार्यहरूलाई दोष दिनुपर्ने उसको भनाइ छ । आक्रमण गर्नुभन्दा जम्मा एक मिनेटअघि उसले चेतावनी दिएकाले सैन्य सर्वेक्षण विमान भाग्न नपाएको उसले बतायो । 

विमानलाई ठ्याक्कै के भएको हो भन्ने प्रस्ट हुन सकेको छैन । त्यसलाई सोमवार साँझ लाटाकियानेरको अड्डामा फर्किरहेको राडारमा देखियो । 

खोजी तथा उद्धार कार्य जारी छ र हमेमिम अड्डामा रहेका सैनिकहरूसँग यसका लागि समन्वय गरिएको मन्त्रालयले जनाएको छ । 

बीबीसीबाट