काठमाडौं– प्रमुख सत्तारुढ दल नेपाल कम्युनिष्ट पार्टी (नेकपा)ले संसदीय सुनुवाई विशेष समितिबाट प्रधानन्यायाधीशमा अस्वीकृत न्यायाधीश दीपकराज जोशीलाई राजीनामा दिन आग्रह गरेको छ । विभिन्न सुत्र मार्फत जोशीलाई राजीनामा गर्न सुझाव दिइएको नेकपाका एक प्रभावशाली सांसदले जानकारी दिए । 

‘जोशीले राजीनामा दिएनन् भने आज भोलि मै महाअभियोग प्रस्ताव दर्ता हुन्छ, त्यसका लागि हस्ताक्षर संकलन भइसकेको छ’ नेकपाका एक सांसदले लोकान्तरसंग भने । राजीनामाका लागि विभिन्न सूत्र मार्फत नेकपाले जोशीसँग सन्देश पठाएको छ । 

जोशीविरुद्ध महाअभियोग दर्ता गर्न नेकपाले सांसदहरुको हस्ताक्षर संकलन गरेको छ । नेकपाका सांसदहरु बिहीवार अबेरसम्म संसदीय दलको कार्यालय सिंहदरवारमा छन् । आजै प्रस्ताव दर्ता हुन सक्ने सम्भावना रहेको भन्दै सांसदहरु संसदीय दलको कार्यालयमा भेला भएका हुन् । 

प्रतिनिधि सभामा कायम रहेका एक चौथाइ सांसदको हस्ताक्षरमा महाअभियोग प्रस्ताव दर्ता गर्न सकिने व्यबस्था छ । गएको साउन १८ गते समितिले जोशीको नाम अस्वीकृत गरेको थियो । संसदीय समितिबाट अस्वीकृत भएपछि जोशी लामो विदामा बसेका थिए । सर्वोच्चमा नयाँ प्रधानन्यायाधीश ओमप्रकाश मिश्र आएपछि जोशी भदौ २६ देखि हाजिर भएर इजलास हेरेका थिए । 

संविधानको धारा १०१ मा महाअभियोग सम्बन्धी व्यबस्था गरिएको छ । संविधान र कानूनको गम्भीर उल्लंघन गरेको, कार्यक्षमताको अभाव वा खराब आचरण भएको वा इमानदारीपूर्वक आफ्नो पदीय कर्तव्यको पालन नगरेको वा आचार संहिताको गम्भीर उल्लंघन गरेमा न्यायाधीशविरुद्ध महाअभियोग लगाउन सक्ने व्यबस्था छ । 

संसदको दुईतिहाइ बहुमतले न्यायाधीशलाई महाअभियोग लगाएर हटाउन सक्ने संवैधानिक व्यबस्था छ ।