काठमाडौं– दशैंका लागि शुक्रबारदेखि खोल्ने भनिएको अग्रिम टिकट बुकिङको सहमति तोडिएपछि यात्रुहरु मर्कामा परेका छन् ।

यातायात व्यवसायीहरुले सरकारका कारण अग्रिम बुकिङ खोल्न नसकिएको आरोप लगाएका छन् ।  

शुक्रबार विहान दशैंको लागि टिकट काँट्न बसपार्क गएका सर्वसाधरण टिकट काउन्टर नखुलेपछि निरास हुँदै फर्किएका छन् । 

दशैंका लागि लामो दुरीको टिकट लिनका लागि बसपार्क पुगेका यात्रुहरु व्यवसायीले अग्रिम टिकट बुकिङ स्थगित गरेको थाहा नपाएको बताएका छन् । 

यता, यातायात व्यवसायीहरुले आफ्ना कारण भन्दापनि सरकारका कारणले टिकट बुकिङ खोल्न नसकिएको बताएका छन् । 

यातायात व्यवसायी राष्ट्रिय महासंघका अध्यक्ष योगेन्द्रनाथ कर्माचार्यले व्यवसायीहरुको रोक्का गरिएको खाता नखोलिदिएसम्म बुकिङ खोल्न नसक्ने चेतावनी दिए । उनले भने, ‘हामी रोक्का भएको खाता नखुल्दासम्म बुकिङ खोल्दैनौं । किनभने, खोल्नु मात्रै महत्त्वपूर्ण होइन । यात्रुहरुको सुरक्षित यात्राको ग्यारेन्टी दिलाउन सक्नुपर्छ । यसबाहेकको कुरा सरकारलाई सोध्नुस् । सरकारलाई सहयोग गर्ने हाम्रो कुरा नसुन्ने मिडियालाई सोध्नुस् । हामीलाई मतलबको कुरा होइन ।’