बुटवल – बिहीवार साँझ जिल्ला प्रशासन कार्यालय रूपन्देहीमा यातायात व्यवसायी र मजदुर संगठनबीच ३ दिनदेखि बन्द गरिएका गाडी चलाउने सहमति भयो ।

प्रमुख जिल्ला अधिकारी उदयबहादुर रानाको अध्यक्षतामा भएको छलफलमा २० जना संगठनका व्यवसायी र चालक सहभागी भएका थिए ।

शुक्रवार बिहानबाट गाडी चल्ने भनिएपनि गाडी चलेनन् । यातायात व्यवसायीले सवारीसाधनको नम्बर र चालकको नामावली प्रशासनमा बुझाउने र गाडी चलाउन आनाकानी गर्ने व्यवसायी र मजदुरको अनुमतिपत्र १५ दिनसम्म निलम्बन गर्ने सहमति गरिएको थियो ।

सरकारले सवारी तथा यातायात व्यवस्था ऐन २०४९ संशोधन गर्दै गाडी दुर्घटनामा यात्रुको ज्यान गए चालकले जेल जानुपर्ने कडा व्यवस्था गरेपछि चालकले मंगलवारदेखि आन्दोलन थालेका हुन् । सहमतिपछि सवारीसाधन निर्वाध रूपमा सञ्चालन गर्ने निर्णय भएपनि त्यसलाई चालकले लत्याइदिएका छन् । 

गाडी नचल्दा विगत ४ दिनदेखि यात्रु बिचल्लीमा परेका छन् । बुटवल बसपार्कमा बिहानैदेखि एउटा समूह जम्मा भएर गाडी चलाउन नदिएको व्यवसायी र मजदुरहरू नै बताउँछन् । शुक्रबारबाट यातायात सञ्चालन हुने अपेक्षा गरेका यात्रुले सवारीसाधन नचल्दा सास्ती खेपेका छन ।

प्रमुख जिल्ला अधिकारी उदयबहादुर रानाले सहमतिपछि पनि गाडी नलाउने चालकलाई कारवाही अगाडि बढाउने बताएका छन् । प्रजिअ रानाले भने, ‘हामी पहल गरिरहेका छौं, प्रयासमा छौं, यदि चलाएनन् भने सोही अनुसार अगाडि बढ्ने छौ ।’

यात्रुवाहक मात्र नभएर ढुवानीका गाडी ट्रक, टिप्पर, ट्यांकर, कन्टेनर समेत नचल्न बजारमा इन्धन लगायत विभिन्न सामग्रीको अभाव हुने थालेको छ ।  ढुवानी ठप्प हुँदा उपभोक्तालाई समस्या भएको छ । चाडपर्वको मुखैमा चालकहरूले सवारीसाधन ठप्प पर्दा यात्रुहरू ठूलो मारमा परेका हुन् । 

नेपाल यातायात स्वतन्त्र मजदुर संगठन ५ नम्बर प्रदेशले भने बुधबार नै विज्ञप्ति जारी गरी गाडी यथावत् चलाउन चालकलाई आग्रह गरेको थियो । संगठनका प्रदेश अध्यक्ष कृष्ण कँडेलले यात्रुहरूलाई असहज हुने गरी गाडी ठप्प पार्ने समूहलाई कारवाहीको दायरामा ल्याउन आग्रह गरेका छन् ।