काठमाडौं– विहीबार सुनसरीमा मौलाना खुर्सिद आलमको गोली हानी हत्या भएको छ । 

दुई वटा मोटरसाइकलमा आएका व्यक्तिले आलमलाई गोली हानी भारततर्फ भागेका थिए । हत्या स्थलबाट नेपाल भारत सीमा सात किलोमिटरको दुरीमा रहेको छ । सीमा रहेको प्रहरीले गोली चलाउने समूहलाई रोक्न खोज्दा प्रहरीमाथि नै उक्त समूहले गोली प्रहार गरेको थियो । त्यसक्रममा एक जना नेपाल प्रहरी घाइते भएका थिए । 

आलमको हत्या भएपछि सुनसरी भुटाहाका स्थानीय र आलमकका परिवारले हत्या भएको २४ घन्टा वित्दासमेत शव उठाउन मानेका छैनन् । 

गृहमन्त्रालयले आलमको हत्याबारे छानबिन गर्न एक समिति गठन गरेको छ । १ नम्बर प्रदेश प्रहरीका वरिष्ठ उपरीक्षक एसएसपी किशोर दाहालको संयोजकत्वमा समिति गठन गरिएको हो ।

मुम्बई बिस्फोटका आरोपी !

भारतीय सञ्चारमाध्यमहरुले खुर्शीद आलम मुम्बई विस्फोटको आरोपी भएको जनाएका छन् । भारतीय सञ्चारमाध्यम आजतकले खुर्सीद आलम मुम्बइ विस्फोटको आरोपी भएको बताएका छन् ।

खुर्सीद आलमको नाम २००८ को भारतमा बाटला इनकाउन्टर को फरार आतंककारी मध्ये एक शहजाद पप्पूको गिरफ्तारीपछि अनुसन्धानका क्रममा बाहिर आएको थियो । शहजाद पप्पू भारतीय प्रहरीका विशेष इन्स्पेक्टर मोहन चन्द शर्मामाथि गोली चलाएको अभियोगमा दोषी प्रमाणित भएका छन् । 

भारतीय सञ्चारमाध्यमहरुले खुर्सीद आलम पाकिस्तानी जासूसी संस्था आईएसआइका लागि काम गर्ने दाबी गरेका छन् । भारतीय आतंकवादी संगठन इन्डियन मुजाहिदीनका सदस्यहरु बाटला इन्काउन्टर पछि भारतबाट भागेर नेपाल आएको र उनीहरुलाई खुर्सीद आलमले आश्रय दिएका थिए । 

इन्डियन मुजाहिदीनका ति मानिसको नेपाली नागरिकता र  पासपोर्ट आलमले नेपालबाट बनाइदिएको भारतीय सञ्चारमाध्यमहरुको दाबी छ ।

आलमले इन्डियन मुजाहिदीनका सदस्यहरुको लागि खाना बस्नको व्यवस्था गर्दै आएका थिए । भारतीय सञ्चारमाध्यमहरुले आलम आईएसआई को नेपालका मुख्य व्यक्ति भएको दाबी गरेका छन् ।