काठमाडौं– गोरखाको छोप्राक स्थायी घर भइ काठमाडौंको तार्केश्वर बस्ने २४ वर्षीय संजय गुरुले शुक्रवार विहान घरबाट निस्केको केही समयमै दिदी सोनी गुरुङलाई म्यासेज पठाए, आत्महत्या गर्दैछु भन्ने आशयको । 

दिदि सोनीलाई आपत् पर्यो । भाइले म्यासेज नै गरेर आत्महत्या गर्न लागेको जानकारी गराएपछि उनले घरमा फोन गरिन् । घरका मानिस पनि थप चिन्तित बने । 

भाइलाई सम्झाउनका लागि उनले धेरै पटक फोन पनि गरिन् । तर संजयले दिदीको फोन उठाएनन् । 

आफ्नो तर्फबाट कुनै शीप नचलेपछि सोनीले अन्ततः प्रहरीलाई खबर गरिन् । 

संयजले आत्महत्या गर्न लागेको खबर पाएपछि महानगरीय अपराध महाशाखाको टोली परिचालन भयो । प्रहरीले उनको फोन ट्रेस गरेर लोकेसन पत्ता लगायो । उनी काठमाडौंको तार्केश्वर नगरपालिका– ११ शेषमतीमा फेला परे । 

प्रहरीले उनलाई शुक्रवार साँझ करिब ६ बजेतिर फेला पार्यो । उनले आत्महत्याको कारणबारे अनुसन्धान गरेर आफन्तको जिम्मा लगाइएको महानगरीय अपराध महाशाखाका प्रमुख प्रहरी वरिष्ठ उपरीक्षक (एसएसपी) धीरजप्रताप सिंहले जानकारी दिए ।