काठमाडाैं- प्रधानमन्त्री केपी ओलीले संयुक्त राष्ट्रसंघ महासभामा भाग लिन जाने तयारीबीच संविधान दिवस समारोहमा टुँडिखेलबाट भनेका थिए, ‘नेपाल अब अधिकारका नाममा गिनी पिग बन्ने दिन गयो ।’
विदेशीहरूले अधिकारको नाममा प्रयोगशाला बनाउन खोजेको भन्दै आएका प्रधानमन्त्रीले अन्तर्राष्ट्रिय समुदायमा असन्तोषको सञ्चार गर्नुको साटो नेपालका उपलब्धिको प्रतिनिधित्व गर्नुपर्ने राष्ट्रसंघीय जानिफकारले बताएका छन् । 

‘मानव अधिकारका क्षेत्रमा नेपालको छवि अन्तर्राष्ट्रिय तहमा नराम्रो छैन, द्वन्द्वको समाधान आफैं खोजेको अनि नयाँ संविधानका साथ शान्तिपूर्ण चुनाव गराएर देशमा स्थिरता ल्याएका कारण नेपालको मूल्यांकन राष्ट्रसंघले पनि राम्रो गरेको छ,’ बिदामा काठमाडौं आइपुगेका जिम्बावेका लागि संयुक्त राष्ट्रसंघीय विकास कोष (यूएनडीपी) का आवासीय प्रतिनिधि विश्व पराजुलीले शनिबार भने । 

‘त्यसमाथि यसै साता नेपालले मौलिक हक कार्यान्वयन गर्ने १६ वटा कानुन पारित गरेको छ । यो उपलब्धि सानो होइन । प्रधानमन्त्रीले नेपालले शान्ति र मानव अधिकारका क्षेत्रमा गरेको प्रगतिलाई अन्तर्राष्ट्रिय रूपमा थाहा दिन न्युयोर्क सम्मेलन ठूलो उपलब्धि हो,’ उनी भन्छन् । नेपाल राष्ट्रसंघीय मानव अधिकार परिषद्को सदस्यसमेत भएकाले विश्वमा शान्ति र मानव अधिकार प्रवद्र्धनमा आफ्नो अनुभवका साथ बलियो भएर उभिन सक्ने अवस्था तयार भएकाले नेपालले यो मौका सदुपयोग गर्नुपर्ने उनी बताउँछन् । कान्तिपुर दैनिकमा विस्तृतमा खबर छापिएकाे छ ।