काठमाडौं–रामबाबु–ज्ञानु सामाजिक सेवा पुरस्कारबाट विभिन्न संस्था र व्यक्तित्व सम्मानित भएका छन् । स्वयम्सेवाको भावनाले नेपालीहरुको हितमा उदाहरणीय योगदान पुर्याएका व्यक्ति र सामाजिक संस्थालाई शनिबार काठमाडौंमा एक कार्यक्रमकाबीच पुरस्कृत तथा सम्मान गरिएको हो । 

नेत्रज्योतिका क्षेत्रमा उदाहरणीय सेवा गरी अन्तर्राष्ट्रियस्तरमा चर्चा कमाएका समाजसेवी डा. सन्दुक रुइतले पुरस्कार तथा सम्मान प्रदान गरेका हुन् । यसवर्ष विराटनगर महानगरपालिका, अशोक चोक, बलुवाहीस्थित विराटेश्वर वृद्धाश्रम सेवा समितिका संस्थापक तथा अध्यक्ष जगत प्रसाद अज्र्याललाई रु दुई लाख र सम्मानपत्र सहित रामबाबु–ज्ञानु सामाजिक सेवा पुरस्कार प्रदान गरिएको छ । 

यस्तै, रामबाबु–ज्ञानु समाजसेवी पुरस्कारबाट ललितपुर महानगरपालिका– २२ बुङमतीस्थित अपाङ्ग सेवा संघका संस्थापक तथा अध्यक्ष दयाराम महर्जनलाई रु. एक  लाख र सम्मानपत्र,  पुरानो सिनामङ्गल, काठमाडौँस्थित विशेष स्कुल तथा पुनर्स्थापना केन्द्रकी  संस्थापक तथा अध्यक्ष सबिता उप्रेतीलाई रु. एक  लाख र सम्मान–पत्र प्रदान गरिएको छ ।

सामाजिक सेवाको विकासमा सहयोग पु¥याउने उद्देश्यले एक अक्षयकोष खडा गरी रामबाबु र ज्ञानु नेपाल दम्पतीले आफ्ना मातापिता शोभाकान्त नेपाल र सुशीला नेपालको स्मरणमा २०७० सालमा स्थापना गरेको रामबाबु–ज्ञानु सामाजिक सेवा पुरस्कार कोषले २०७१ सालदेखि रु. दुई लाखको पुरस्कार र सम्मान प्रदान गर्दै आएकोमा विगत वर्षदेखि रु चार लाख रकमको पुरस्कार प्रदान गर्न थालेको हो ।