काठमाडौं – राष्ट्रियसभा सदस्य दिलकुमारी रावल थापा (पार्वती) ले चाडबाडको मुखमा दैनिक उपभोग्य वस्तुको सुपथ र सहज बिक्री वितरणको व्यवस्था मिलाउन सरकारको ध्यानाकर्षण गराएकी छन् ।

आइतवार राष्ट्रियसभा बैठकको शून्य समयमा बोल्दै सांसद रावलले उपभोग्य वस्तुहरूको कृत्रिम अभाव सिर्जना गरी कालोबजारी हुने गरेकोतर्फ पनि सरकारको ध्यानाकर्षण गराइन् ।

'चाडबाडको मुखमा दैनिक उपभोग्य वस्तुहरूको कृत्रिम अभाव सिर्जना गरी कालोबजारी गर्ने अवस्थाको अन्त्य गर्नका लागि सरल र सहज रूपमा दैनिक उपभोग्य वस्तुको बिक्री वितरणको व्यवस्था मिलाउन सम्माननीय अध्यक्षज्यूमार्फत् सरकार र सम्बन्धित मन्त्रालयको ध्यानाकर्षण गराउन चाहन्छु,' उनले भनिन् ।

साथै रावलले दशैं, तिहार, छठलगायतका चाडबाडमा राजधानीबाट घर फर्किने यात्रुहरूका लागि पनि सहज यात्राको व्यवस्था मिलाउन माग गरिन् ।

'यात्रुहरूको चाप र शान्ति सुरक्षालाई मध्यनजर गर्दै राजधानीबाट बाहिर जाने यात्रुहरूलाई सहज यात्राको व्यवस्था मिलाउन म अध्यक्षज्यूमार्फत् सम्बन्धित मन्त्रालयको ध्यानाकर्षण गराउन चाहन्छु,' उनले भनिन् ।

रावल राष्ट्रिसभाअन्तर्गत राष्ट्रिय सरोकार तथा समन्वय समिति सभापति समेत हुन् । उक्त समितिले शुक्रवार बैठक नै बसेर यी विषयमा सरकारको ध्यानाकर्षण गराएको थियो ।