काठमाडौं –राष्ट्रिय जनता पार्टी (राजपा)ले सर्वोच्च अदालतका न्यायाधीश दीपकराज जोशीमाथि महाअभियोग नलगाउन सत्तारुढ नेकपाको ध्यानाकर्षण गराएको छ । 

राष्ट्रिय सभाको आइतवार बसेको बैठकको विशेष समयमा राजपाका वृषेशचन्द्र लालले संसदको सर्वोच्चता स्वीकार गरेर जोशीले नयाँ प्रधानन्यायाधीशलाई स्वीकार गरिसकेकाले महाअभियोग आवश्यक नभएको बताएका हुन् । 

‘संसदको सर्वोच्चतालाई दीपकराज जोशीले स्वीकार गर्नुभएको छ । संसदको निर्णयलाई पालना गरेर राजीनामा नगरी संसदले स्वीकृत गरेको प्रधानन्यायाधीशसँग सँगै बस्नुभएको छ,’ सांसद लालले भने, ‘यो संसदको लागि पनि गौरवपूर्ण कुरा र परम्परा स्थापित गर्ने कुरा  हो, महाअभियोगको कुरा गरेर न्यायापालिकामाथि दबाब दिने काम उचित हुँदैन ।’

राजपा सांसद लालले न्यायाधीशको नियुक्तिमै गडबडी हुने गरेको भन्दै कमजोरी सच्चाउनु पर्ने तर न्यायपालिकालाई विवादमा राख्नु नहुने बताए ।