धनगढी – नेपाल कम्यूनिस्ठ पार्टीका नेता तथा ७ नम्बर प्रदेश इन्चार्ज भीम रावलले नेकपाको जिल्ला तथा स्थानीय तहमा पार्टीको एकीकरण चाँडै टुंगिने बताएका छन् ।

सोमवार धनगढीमा आयोजित पत्रकार सम्मेलनमा बोल्दै उनले जिल्ला र स्थानीय तहको लागि नाम सिफारिस करीब–करीब अन्तिम चरणमा पुगेको बताउँदै केन्द्रको परिपत्रको पर्खाइमा रहेकाले केही दिनमै टुंगिने बताएका हुन् ।

इन्चार्ज रावलले प्रदेश कमिटी पूर्णता पाएकाले कमिटीले प्रदेश सरकार तथा प्रदेश सरकारका मन्त्रीको कामको पनि मूल्यांकन गरिने बताएका छन् । प्रदेश मन्त्रीको कामबारे आलोचना तथा टिकाटिप्पणी भइरहेको बताउँदै उनले मूल्यांकन गरिने बताएका हुन् । तर, वर्तमान सरकारप्रति जनताको धेरै आशा रहेकाले पनि सरकारको आलोचना भइरहेको उनको भनाई थियो ।

उनले संघीयता नयाँ प्रयोग भएकाले सरकारलाई काम गर्न जटिल रहेको बताएका छन् । सरकारको केही काममा अलमल समेत पर्न गएकाले प्रदेश सरकारले सुस्तगतिमा काम गरिरहेको भान पर्न गएको हुन सक्ने समेत उनले बताए । उनले प्रदेश सरकारले संरचना बनाउने, कानून बनाउने र प्रयोग गर्दै जानुपर्ने स्थितिमा उनीहरूको काममा आलोचना गरिहाल्नुपर्ने स्थिति नरहेको समेत स्पष्ट पारे ।

नेकपा प्रदेश कमिटीमा जिम्मेवारी नपाएका नेता लेखराज भट्टले आफ्नो कुनै गुनासो नभएको बताए । उनले पार्टीले पद तथा जिम्मेवारी बाँडफाँडमा कुनै पक्षपात नरहेको समेत बताएका छन् । तर, केही सञ्चारमाध्यममा उनले थारु समुदायका नेपबहादुर चौधरीलाई प्रदेश सचिवको जिम्मेवारी दिँदा जिम्मेवारी नपाएको भन्ने समाचार आएको थियो ।