बुटवल – अर्थमन्त्री डा. युवराज खतिवडाले विकासका ठूलो आयोजना समयमा सक्न ठेकेदारलाई निर्देशन दिएका छन् ।

मुलुकमा निर्माणाधीन ठूला आयोजना समयमै सम्पन्न नहुँदा मुलुकमा विकासले गति लिन नसकेको भन्दै आयोजनका काम लम्बाउने छुट कसैलाई नभएको बताए । 

बुटवल उद्योग वाणिज्य संघको ६५ औं वार्षिक साधारण सभाको सोमवार बुटवलमा उद्घाटन गर्दै मन्त्री खतिवडाले भने, ‘ठूलो आयोजनाहरू अस्तव्यस्त छन् । म ५ वर्ष अगाडि आउँदा पनि बुटवल–बेलहिया सडकमा धुलो उडेको थियो । अहिले आउँदा पनि उस्तै छ । यस्ता आयोजना समयमै सकाउन सबैको ध्यान जान आवश्यक छ । विकासका आयोजनाको निगरानी  निजी क्षेत्रले पनि पनि गर्नुपर्छ ।’ 

निर्माण ठेक्का लिने ठेकेदारले आयोजनाका काम झुलाउँदा त्यसको प्रत्यक्ष असर सरकारलाई परेको खतिवडाको भनाइ थियो । अर्थमन्त्री खतिवडाले व्यावसायिक, कृषि, प्लटिङ्ग लगायतका जग्गाको प्रकृति छुट्याएर सम्पत्ति कर निर्धारण गर्न निर्देशन दिइएको उनले बताए ।

कर बढेको गुनासो आएपछि त्यसलाई निर्धारण गर्नका लागि संसदमा विधयेक लैजाने तयारी गरेको खतिवडाले जानकारी दिए । कर निर्धारण बारेको विधयेक पास भएपछि करको समस्या पनि समाधान हुने उनको भनाई छ ।

‘केही क्षेत्रमा बढेको कर जायज छ, सरकारले सडक, विद्युत् सहितका सुविधा पुर्याएको छ । त्यसले गर्दा जग्गाको भाउसमेत बढेको छ । त्यसलाई जनताले बुझ्नुपर्छ, तर हामीले जनताको क्षमतालाई हेरेर कर निर्धारण गर्नुस् भनेका छौं, आयआर्जन नगर्ने र नगद प्रभाव गर्न नसक्ने सम्पत्ति उपर कर नबढाउनुस् भनेकाले त्यसलाई घटाइने छ,’ खतिवडाले भने । उनले केही दिनमा बैंकको ब्याजदर पनि घटाउनेबारे छलफल भएको जानकारी दिए ।

खतिवडाले रूपन्देही नेपालको भाग्यमानी शहर भएको बताएका छन् । बुटवल प्रदेश पाँचको राजधानी, पूर्वपश्चिम र उत्तर दक्षिण रेलमार्गको केन्द्रबिन्दू बुटवल पर्ने भएको बताए । खतिवडाले भने, ‘अब यहाँ केवलकार पनि छन् ।

बुटवलमा ठूलो आर्थिक केन्द्र बन्दै छ । बुटवल भाग्यमानी हो । यस्तो अवसर कुनै शहरमा देखिएको छैन,’ उनले थपे, ‘बुटवल अब नेपालकै ट्रान्जिट पोइन्ट बनेको छ ।’