काठमाडौं–लुका मोड्रिक यो वर्षको फिफा वर्षा खेलाडी बन्न सफल भएका छन् । विश्व फुटबलको प्रशासकीय निकाय फिफाले वर्षको उत्कृष्ट फुटबलरलाई प्रदान गर्ने उत्कृष्ट पुरुष फुटबलर अवार्ड अर्थात वर्ष खेलाडीको अवार्ड लुका मोड्रिकले पाएका हुन् ।

योसँगै क्रिष्टियानो रोनाल्डो र लियोनल मेस्सीको एक दशक देखिको दबदबा तोडिएको छ । गएको एक दशकदेखि रोनाल्डो वा मेस्सीले वर्षको उत्कृष्ट फुटबलरले पाउने बालोन डी’ ओर वा फिफा वर्ष खेलाडी अवार्ड पाउँदै आएका थिए ।
लण्डनमा सोमबार राति घोषण भएको अवार्डमा क्रोएसिया तथा रियल मड्रिडका मिडफिल्डर मोड्रिकले आफ्ना पूर्व टिम मेट (टिमका साथी खेलाडी) ३३ वर्षे रोनाल्डो र लिभरपुलका मोहम्मद सालहलाई पछि पार्दै वर्ष फुटबलरको अवार्ड आफ्नो नाममा लेखाए ।

यस्तै महिला वर्ष फुटबलको अवार्ड ब्राजिल तथा ओरलाण्डोकी फरवार्ड मार्ताले जितिन् । फ्रान्सका डिडियर डेसच्याम्पस वर्षको उत्कृष्ट प्रशिक्षक भए । यस्तै महिला टिमको प्रशिक्षकको उत्कृष्ट अवार्ड फ्रान्सेली पुरुष फुटबल टिमका पूर्व मिडफिल्डर रेनल्ड पेड्रोसले जिते ।