बुटवल – बुटवलको मुख्य बजार क्षेत्र गल्लामण्डीमा लामो समयदेखि पिच गर्न रोकिएको सडक ठेकेदारले दशैंको मुखमा आएर बल्ल पिच गर्ने काम थालेको छ ।

शुक्रवार बजार नै बन्द गराएर पिचको काम थालेको हो । वर्षायामको शुरूमा निर्माण थालिएको सडकको लामो समयसम्म कालोपत्रे नहुँदा उपभोक्ता र व्यापारीले हैरानी व्यहोर्दै आएका थिए । 

वर्षा रोकिएको भन्दै दशैंको बेलामा बल्ल ठेकेदारले काम थाल्दा उपभोक्ता र व्यापारीले सास्ती खेप्न बाध्य भएका हुन् । ग्राहक बढी आउने र कारोबार हुने दशैंको मुखमा बजार बन्द गर्नुपरेको छ । उपभोक्ता समितिमार्फत् सडक बन्न लागेको हो ।

सडकमा ४० प्रतिशत उपभोक्ता समिति र ६० प्रतिशत नगरपालिकाको लगानी हुन्छ । बुटवल उपमहानगपालिकाले ठेकेदारलाई पटक–पटक छिटो काम सम्पन्न गर्न आग्रह गर्दै आएको थियो ।