बुटवल – ५ नम्बर प्रदेशका मुख्य राजमार्गदेखि विभिन्न स्थानीय रूटमा चल्ने सार्वजनिक सवारी साधनका चालकलाई अनिवार्य पोशाक लगाउने व्यवस्था गरिने भएको छ ।

प्रदेशको आन्तरिक मामिला तथा कानून मन्त्रालयले बढ्दो सवारी दुर्घटना न्यूनीकरणका लागि चालकलाई जिम्मेवार बनाउन पोशाक अनिवार्य लगाउनुपर्ने व्यवस्था बनाउन लागेको हो । 

सरकारले पहिलो चरणमा चालकलाई ज्याकेटमा प्रदेश सरकारले लगानी गर्ने तयारी गरेको छ । पछिल्लो समय भइरहेको सवारी दुर्घटना चालकको लापरवाही मुख्य देखिने ट्राफिक प्रहरीको तथ्यांकमा देखिन्छ । प्रदेशमा आन्तरिक मामिला तथा कानूनमन्त्री कूलप्रसाद केसीले प्रदेशलाई सुरक्षित यात्राको पहिचान गराउने गरी चालकहरूलाई अनिवार्य ‘ड्रेस’ बनाउने गरी आफूहरू काम गर्न थालेको बताए ।

‘हवाइजहाज चलाउने पाइलटको ड्रेस हुने, स्कूलका गाडी चलाउनेको पोशाक हुने । सार्वजनिक गाडी चलाउनेको आफ्नो पहिचान दिने गरी पोशाक किन नहुने ?’ उनले थपे, ‘हामी चालकहरू पोशाक लगाउने व्यवस्था छिट्टै लागू गछौं । हाम्रो प्रदेशमा प्रवेश गरेपछि हरेक यात्रुले चिनोस् । यहाँका चाककहरूको यस्तो पोशाक रहेछ । यात्रु पनि ढुक्कले गाडी चढुन् प्रदेशका चालकहरू जिम्मेवार छन् भनेर ।’

प्रदेशमा झण्डै १० हजार यात्रुवाहक गाडीका चालकहरू रहेको यातायात व्यवसायीको भनाइ छ । सबै चालकहरूको एउटै ड्रेस हुनेछ । यो व्यवस्था छिट्टै लागू गर्ने प्रदेश सरकारले तयारी थालेको छ ।

पश्चिम नेपाल बस व्यवसायी संघका वरिष्ठ उपाध्यक्ष नारायणप्रसाद घिमिरले प्रदेश सरकारले उठाएको विषय राम्रो रहेको भन्दै आफूहरू त्यसको लागि सहकार्य गर्न तयार रहेको बताए । ‘प्रदेश सरकारले त पहलकदमी लिने बताएको छ,’ घिमिरले भने, ‘सरकारले ड्रेस चालकलाई उपलब्ध गराउनुपर्छ । सबै चालकहरूले तत्काल समितिले डे«ेस किनेर उपलब्ध गराउन सक्दैनन् । हामीहरू यो कामको लागि सहकार्य गर्न तयार छौं ।’

हरेक गाडीमा टाइम कार्ड लागू हुनेछ । चाँडो जान पाइँदैन । चालकरूलाई ड्रेससँगै प्रदेशका ३ स्थानमा रिफ्रेश सेन्टर पनि यसै वर्षभित्र बनाउने तयारीमा जुटेको छ । मन्त्री केसीका अनुसार प्रदेश प्रवेश बिन्दु नवलपरासीको बर्दघाट, दाङको लमही र बर्दियाको बासगडीमा गाडी चालकलाई रिफ्रेश सेन्टर बनाउन लागेको हो । ‘लामो समयसम्म चालकहरू गाडी चलाउँदा थकित हुन्छ,’ केसीले भने, ‘रिफ्रेस सेन्टरमा कम्तिमा आधा घण्टा चालकहरू बसेर हातमुख धुने र आनन्दित भई फेरि यात्रा शुरू गर्नुपर्छ ।’

रिफ्रेश सेन्टरमा प्रवेश नगरी गाडी चलाउनेहरू कारबाहीमा पर्ने छन् । त्यहाँ सीसीटीभी क्यामेरा जडिन हुनेछ । गार्डेन सहितको बन्नेछ । 

प्रदेश ट्राफिक प्रहरी कार्यालय बुटवलका डीएसपी माधवप्रसाद बुढाथोकीले बढ्दो सडक दुर्घटना न्यूनीकरणका लागि सबैको सहकार्य र एकता आवश्यक भएको बताए । पोशाक लगाएको चालक आफ्नो पोशाकको मर्यादा राख्न पनि अनुशासित भएर बस्ने बुढाथोकीले बताए । 

दूर्घटना न्यूनीकरण गर्न बुटवलमा प्रभातफेरी

प्रदेश ट्राफिक प्रहरी कार्यालय बुटवल र सुरक्षित यात्रा नेपालले मंगलवार बुटवलमा दुर्घटना न्यूनीकरण सम्बन्धी जनचेतनामूलक प्रभातफेरी निकालेको छ । बुटवल राजमार्ग चौराहाबाट शुरू भएको र्‍याली मिलनचोक, बसपार्क, पुष्पलाल पार्क हुँदै ट्राफिक चोकमा पुगेर सभामा परिणत भएको थियो । र्‍यालीमा विभिन्न यातायात क्षेत्रका संघसंस्था, ट्राफिक प्रहरी, विद्यार्थी सर्वसाधारणको सहभागिता रहेको थियो । 

कार्यक्रममा बोल्दै सुरक्षित यात्रा नेपालका अध्यक्ष कृष्णप्रसाद बेल्वासेले दुर्घटना न्यूनीकरणका लागि सबैको सहकार्य र एकता आवश्यक भएको बताए । उनले यातायात क्षेत्रको अस्वस्थ प्रतिष्पर्धालाई प्रदेश सरकारले नियन्त्रण गरी दुर्घटना न्यूनीकरणका लागि काम थाल्नुपर्ने बताए । 

कार्यक्रममा मन्त्री केसी, डीएसपी बुढाथोकी, न्यू होराइजन माविका प्राचार्य लोकनाथ उपाध्याय, पश्चिम नेपाल बस व्यवसायी संघका अध्यक्ष दधिराम खरेल, अधिवक्ता महेन्द्र पाण्डे, साहित्यकार दलबहादुर गुरूङ लगायतले बोलेका थिए ।