लाखौं उइगुर मुसलमानलाई राखिएको शिविरलाई चीनले दियो वैधता

असोज २५, २०७५

काठमाडौं — चीनको उत्तरपश्चिममा रहेको शिनजियाङ क्षेत्रमा सरकारले १० लाख मुसलमानहरू शिविरमा राख्ने कामलाई वैध बनाएको छ ।

अन्तर्राष्ट्रिय रूपमा निरन्तर आलोचना भएपछि चिनियाँ अधिकारीहरूले क्षेत्रीय सरकारलाई शिक्षा तथा तालिम केन्द्रमा अतिवादबाट प्रभावित मानिसलाई थुन्न अनुमति दिने गरी कानून संशोधन गरेका छन् । 

चिनियाँ अधिकारहरूले हिरासत शिविरहरूको अस्तित्वलाई अस्वीकार गरेका छन् र सानातिना अपराध गर्नेहरूलाई व्यावसायिक तालिम केन्द्रमा पठाइएको बताएका छन् । उता पूर्वबन्दीहरूले आफूलाई राजनीतिक सिद्धान्त
सिकाउने शिविरहरूमा इस्लाम त्याग्न अनि कम्युनिस्ट पार्टीमा बफादारिता प्रकट गर्न लगाइने गरेको बताएका छन् । 

मंगलवार प्रकाशित संशोधनहरूमा सरकारी निकायले काउन्टी तहमा र त्यसभन्दा माथि व्यावसायिक क्षमता शिक्षा र तालिम केन्द्रहरू, शिक्षा परिवर्तन संस्था र व्यवस्थापन विभागहरू स्थापना गरेर अतिवादबाट प्रभावित मानिसलाई परिवर्तन गर्न सक्ने व्यवस्था गरिएको छ ।

नयाँ कानूनको एक परिच्छेदले ती केन्द्रहरूलाई म्यान्डरिन भाषा पढाउने तथा व्यावसायिक र कानूनी शिक्षा दिलाउने अनि साथसाथै सैद्धान्तिक शिक्षा, मनोवैज्ञानिक पुनःस्थापना र व्यवहार सुधार सिकाउने व्यवस्था मिलाउन निर्देशन
दिएको छ । 

रेडियो र टेलिभिजन जस्ता सार्वजनिक वस्तुलाई अस्वीकार गर्नबाट रोक्ने अर्को परिच्छेद छ । चिनियाँ सरकारी सञ्चारमाध्यमले प्रायः शिनजियाङको विकासको प्रशंसा गर्ने तथा उक्त क्षेत्रमा स्थिरताका लागि सरकारको भिजनलाई प्रवर्द्धन गर्ने कार्यक्रमहरू प्रसारण गर्छन् । 

चीनको परिवार नियोजन नीतिले परिवारको आकारमा नियन्त्रण गर्छ र त्यसको कार्यान्वयनलाई रोक्ने व्यवहारमाथि संशोधित नियमले प्रतिबन्ध लगाएको छ । गत वर्ष अधिकारीहरूले हान चिनियाँको तुलनामा उइगुर तथा अन्य
अल्पसंख्यक जातिहरूलाई बढी सन्तान जन्माउन पाउने व्यवस्थालाई खारेज गरेका थिए ।

द गार्डियनबाट


ADVERTISEMENT

असोज २५, २०७५ मा प्रकाशित

प्रतिक्रिया दिनुहोस