बुटवल – ५ नम्बर प्रदेशका भूमि व्यवस्था, कृषि तथा सहकारी मन्त्री आरती पौडेलले अबको ५ वर्षमा उत्पादनलाई दोब्बर बढाउने गरी मन्त्रालयले योजना अगाडि बढाएको बताएकी छन् ।

उनले किसानलाई निर्वाहमुखी कृषिबाट व्यावसायिक बनाउने योजना मन्त्रालयले बनाएर अगाडि बढेको जानकारी दिँदै सोही अनुसारको विकास गरी अबको ५ वर्षमा कृषिजन्य उत्पादन दोब्बर हुने बताएकी हुन् ।

लुम्बिनी मल्टीप्रपोज एग्रिकल्चर डेभलपमेन्ट प्रालिको बुटवलमा शुभारम्भ गर्दै कृषिमन्त्री पौडेलले प्रदेश सरकार निजी क्षेत्रसँग हातेमालो गर्न तयार भएको जानकारी दिँदै यसको लागि विचौलियाभन्दा पनि किसानलाई उत्पादनको उचित मूल्य दिनुपर्ने र सोही अनुसारको धेरै नाफा नखाएर कृषिजन्य सामग्री उत्पादन बिक्री वितरण गर्नुपर्ने धारणा राखिन् ।

उनले प्रविधिमा सुधार गरी किसानलाई आत्मनिर्भर बनाउन प्रदेश सरकारले कोठामुखी तालिम गोष्ठीलाई परिर्वतन गरी किसानको अपेक्षा अनुसार सम्बन्धित थलोमा नै प्रयोगात्मक रुपमा कृषिजन्य तालिम आयोजना गर्न लागिएको जानकारी दिइन् ।

मन्त्री पौडेलले भनिन्, ‘प्रविधिमा सुधार गरी प्रदेशको कृषि लगायतका अन्य विकासको अवधारणा अगाडि बढाएका छौं ।’ रसायनिक मलको विकल्पमा जैविक मल प्रयोग गर्ने सरकारको योजना अनुसार रोल्पा र रुकुम जिल्लाबाट जैविक जिल्ला (अर्गानिक) को रुपमा पहिचान बनाउनको लागि प्रस्ताव समेत आइसकेको मन्त्री पौडेलको भनाई रहेको थियो ।

किसानलाई ज्ञान, सीप र धारणाको विकासमा प्रविधिको मुख्य भूमिका रहेको भन्दै मन्त्री  पौडेलले विचौलिया मोटाउने दिन अब गएको बताएकी हुन् । उत्पादन र उत्पादकत्व वृद्धिमा सरकारको ध्यान गएको मन्त्री पौडेलको भनाई रहेको छ ।

कार्यक्रममा इन्टेन्सीप मल्टी प्रपोज एग्रीकल्चर डेभलमेन्ट कम्पनी प्रालि अन्नपूर्ण किसान फिड एण्ड फर्टिलाईजर  विराटनगर वरिष्ठ कृषि वैज्ञानिक डा. गोविन्द पोखरेलले नेपाली जमिनमा रहेको माटो बिस्तारै उत्पादकत्व कमी हुँदै जाँदा यसको आयू समाप्त हुँदै गएको बताए । उनले यसको लागि अबको अन्तिम विकल्प भएको जैविक मल, विषादीको प्रयोग गरी अर्गानिक उत्पादनमा जोड दिएका थिए ।

हरेक १० किलोमिटर क्षेत्रफलमा हावापानीको  प्रवलता फरक–फरक भएको नेपालको हावापानी रहेकोमा त्यसमा  ठोस  ध्यान जान नसकेका कारण नेपालको कृषि क्षेत्रमा आशातित विकास नभएको उनले बताए ।

कार्यक्रममा बोल्दै लुम्बिनी मल्टी प्रपोज एग्रीकल्चर डेभलपमेन्ट प्रालिका अध्यक्ष कृष्णप्रसाद पोखरेलले अर्गानिक मल, राईबोजिम, आर्गानिक विषादी लगायत अन्य विभिन्न अर्गानिक उत्पादन ईन्टेन्सिभ मल्टीप्रपोज एग्रीकल्चर डेभलमेन्ट प्रालि काठमाडौंको सहकार्यमा प्रदेशका सबै जिल्लामा बिक्रीवितरण गर्ने योजना बनाएको जानकारी दिए ।

कार्यक्रममा प्रदेशसभा सदस्य तुलबहादुर घर्ती ‘वसन्त’, कुलप्रसाद पोखरेल, लुम्बिनी मल्टी प्रपोज एग्रीकल्चर डेभलपमेन्ट प्रालिका सञ्चालक रघुपति चुदादी, बुटवल वडा नम्बर ९ का वडाध्यक्ष विष्णुबहादुर थापा लगायतले बालेका थिए ।