काठमाडौं — अमेरिकी अनुसन्धान अधिकारीहरूले इस्तानबुलको साउदी वाणिज्य दूतावासबाट हराएका जमाल खशोग्गीको बेपत्तामा अनुसन्धान गरिरहेको अमेरिकी राष्ट्रपति डोनल्ड ट्रम्पले बताएका छन् । 

तर यसको जेसुकै परिणाम आएपनि अमेरिकाले रियादसँग महंगो हतियार सम्झौता नत्याग्ने उनले प्रस्ट पारेका छन् । 

इतर विचार राख्ने पत्रकार खशोग्गीलाई चुप लगाउने षड्यन्त्रमा हात रहेको आशंका गरिएका साउदी अरबका शक्तिशाली युवराज मोहम्मद बिन सलमानले प्रमाण लुकाउन सक्ने चिन्ता ट्रम्पको घोषणाले जन्माएको छ । अनि टर्की र
साउदी सरकार मिलेर घटनाको संयुक्त अनुसन्धान गर्ने घोषणा गरेपछि चिन्ता झन् बढेको छ । 

साउदी सरकार नियन्त्रित अल–अरेयिबा टीभी नेटवर्कले १५ जना आरोपितहरू पर्यटक रहेको र उनीहरू कमर्सियल विमानमा इस्तानबुल पुगेको बताएको छ । 

कंग्रेसमा रहेका वरिष्ठ रिपब्लिकनहरूलाई अमेरिकी जासूसी निकायले यसबारेमा जानकारी दिइसकेका छन् । खशोग्गीलाई साउदी सरकारले मारेको खुलेमा अमेरिकाले दण्डात्मक कारवाहीको तयारी गर्ने रिपब्लिकनहरूले संकेत
गरेका छन् । 

‘हामीहरू कठोर रूपमा प्रस्तुत भइरहेका छौं । अनि हाम्रा अनुसन्धान अधिकारीहरू त्यहाँ पुगेका छन् र हामीहरू टर्कीसँग मिलेर र स्पष्ट रूपमा भन्नुपर्दा साउदी अरबसँग मिलेर काम गरिरहेका छौं । के भएको हो हामीहरू पत्ता
लगाउन चाहन्छौं,’ ट्रम्पले फक्स न्युजलाई बिहीवार बिहान बताए । 

अमेरिकी अनुसन्धान अधिकारीहरू टर्कीमा भए नभएको अमेरिकी अधिकारीहरूले पुष्टि गर्न सकेनन् । टर्कीले अहिलेसम्म अमेरिकाको सहायतालाई अस्वीकार गरिरहेको छ । 

अमेरिकी अनुसन्धान अधिकारीहरू टर्कीको जमीनमा भए नभएको विषयमा टिप्पणी नगर्ने परराष्ट्र मन्त्रालयकी प्रवक्ता हेदर नोअर्टले बताइन् । यसबारेमा अन्य प्रश्न एफबीआईलाई सोध्न मन्त्रालयले भनेको छ ।

द गार्डियनबाट