पेट चिरेर बच्चा जन्माउने दर चिन्ताजनक रूपमा बढ्दै

असोज २६, २०७५

काठमाडौं — सिजेरियन सेक्सन अर्थात् आमाको पेट चिरेर बच्चा जन्माउने दर महामारीको अनुपातमा फैलिएको र यो चिन्ताजनक रूपमा प्रयोग भइरहेको विज्ञहरूले बताएका छन् । 

आमा र बच्चाको सुरक्षाका लागि सिजेरियन सेक्सन एक महत्त्वपूर्ण प्रक्रिया हो । उदाहरणका लागि, जन्मअघि बच्चालाई अप्ठ्यारो परिरहेको छ वा आमाको रक्तस्राव भइरहेको छ भने यसको आवश्यकता पर्छ । 

तर विज्ञहरूले यस्तो अवस्था १० देखि १५ प्रतिशत मात्र हुने र स्वास्थ्यका लागि आवश्यक भएमा मात्र गर्नुपर्ने बताए । 

लान्सेट जर्नलमा प्रकाशित अध्ययन र टिप्पणीहरूको नयाँ शृंखलामा अनुसन्धानकर्ताहरूको एक टोलीले धेरै देशहरूमा सिजेरियनको संख्या तीव्र रूपमा बढिरहेको र सन् २०१५ मा २१ प्रतिशत जन्म यसैमार्फत भएको पाएका छन् । 

डोमिनिकन रिपब्लिकमा ५८ प्रतिशतभन्दा बढी अनि इजिप्टमा ६३ प्रतिशत बच्चाहरू सिजेरियनबाट जन्माइएका पाइए । 

स्वास्थ्य कारणले बाहेक सिजेरियन गराउन नहुने विषयमा महिला, उनीहरूका परिवार र स्वास्थ्यकर्मीहरूमा सचेतना फैलाउनुपर्ने विज्ञहरूको राय छ । 

‘सिजेरियन गराएका महिला अर्कोपटक गर्भवती हुँदा बच्चा समयअगावै जन्मने, गर्भाशय च्यात्तिने र गर्भाशयको गलत भागमा प्लासेन्टा जम्ने सम्भावना हुन्छ जसले गर्दा बच्चा पाएपछि उनलाई रक्तस्राव हुने र हिस्टेरेक्टोमी गर्नुपर्ने
आवश्यकता आइपर्छ,’ अध्ययनकी सहलेखिका जेन स्यान्डालले बताइन् ।

यसबाट आमाका गोडामा रगत जम्ने, बेहोश बनाउने औषधिले समस्या ल्याउने अनि संक्रमण हुने समस्या पनि आइलाग्छन् । अनि बच्चाको रोगप्रतिरोधक क्षमतामा समस्या आउने हुन सक्छ । बच्चाको पेटमा समस्या आएर अत्यधिक
मोटोपन र दमको जोखिम बढ्ने पनि यसबाट हुन सक्छ । 

द गार्डियनबाट
 


ADVERTISEMENT

असोज २६, २०७५ मा प्रकाशित

प्रतिक्रिया दिनुहोस