तिलोत्तमा र दातृ निकायका प्रतिनिधिबीच छलफल

असोज २६, २०७५

बुटवल – रुपन्देहीको तिलोत्तमा नगरपालिकामा विभिन्न दातृ निकायका प्रतिनिधिले छलफल गरेका छन् ।

विश्व बैंकका नेपालस्थित कन्ट्री डाइरेक्टर फारिस हदाद जर्वोस, बेलायती सहयोग नियोग डीएफआइडीका सुशासन हेर्ने टिम लिडर सिन्थिया रोय, युरोपियन युनियनका नेपालस्थित प्रमुख ओविद्यु, युएनडीपीका सहायक आवासीय प्रतिनिधि यमनाथ शर्मा, युरोपियन युनियनका कन्सलटेन्ट तेजराज दाहाल लगायत दातृ निकायको टोलीले बिहीवार र शुक्रवार तिलोत्तमा नगरपालिकासँग छलफल गरेको हो ।


ADVERTISEMENT

छलफलमा नगरपालिकाको तर्फबाट नगर प्रमुख वासुदेव घिमिरे, उपप्रमुख जगेश्वरदेवी चौधरी, प्रमुख प्रशासकीय अधिकृत कृष्णप्रसाद सापकोटा, उपसचिव हरिप्रसाद ज्ञवाली, प्रवक्ता सुरेन्द्र श्री, कार्यपालिका सदस्य, सल्लाहकार, कर्मचारी लगायतको सहभागिता रहेको थियो ।

दातृ निकायका प्रतिनिधिले नगरपालिकाबाट हालसम्म सम्पादन भएका काम, प्रस्तावित योजना तथा कार्यक्रम र कार्यसम्पादन गर्दा भोग्नुपरेका समस्याबारे जानकारी लिएका थिए । उनीहरूलाई नगर प्रमुख घिमिरेले नगरपालिकाको वस्तुस्थिति, नगरपालिकाले अघि सारेको नीति तथा कार्यक्रम, योजनाबारे जानकारी गराए  ।

नगर प्रमुख घिमिरेले सीमित स्रोतसाधनले ठूला पूर्वाधार विकासका काम गर्न नसकिने बताउँदै नगरपालिकाले अघि सारेका रिङरोड, क्षेत्रीय बसपार्क, सडकको स्तरोन्नति, कृषि उपज संकलन तथा प्रशोधन केन्द्र, अत्याधुनिक ल्यान्डफिल्ड साइडलगायत प्रस्तावित योजनामा सघाउन दातृ निकायका प्रतिनिधिलाई आग्रह गरे ।

त्यस अवसरमा विश्व बैंकका नेपालस्थित कन्ट्री डाइरेक्टर फारिस हदाद जर्वोसले संघ, प्रदेश र स्थानीय तहको संस्थागत संरचना, जनशक्ति, पूर्वाधार, क्षमता विकासका सन्दर्भमा विश्व बैंकले काम गर्न चाहेको जानकारी गराएका थिए ।

उनले ५ नम्बर प्रदेशमा पर्यटन विकासका लागि तयार हुँदै गरेको सहयोग सम्बन्धी आयोजनाबारे जानकारी गराउँदै तिलोत्तमा नगरपालिकासँग मिलेर काम गर्न आफूहरू तयार रहेको बताए ।

असोज २६, २०७५ मा प्रकाशित

प्रतिक्रिया दिनुहोस