विराटनगर– विराटनगर महानगरपालिकाले बजार अनुगमन शुरु गरेको छ । अनुगमनको क्रममा महानगरका कतिपय  पसलहरूले न्यूनतम मापदण्ड समेत पूरा नगरेको पाइएको छ । साथै खरिद मूल्यभन्दा अत्याधिक मूल्यवृद्धि गरी सामानको बेचबिखन गर्ने गरेको भेटिएको छ । 

चाडवाडका बेला उपभोक्ता ठगिने गरेको गुनासो आएसँगै दैनिक अनुगमन गर्न थालेको उपमेयर इन्दिरा कार्कीले जानकारी दिइन् । बिहीवार र शुक्रबार दुई दिन गरिएको अनुगमनका क्रममा उपभोक्ताहरू ठगिने गरेको पाइएको हो ।
 
उपमेयर कार्कीले मिठाइ पसलदेखि जुत्ता पसलसम्म उपभोक्ता ठगिने गरेको पाइएको बताइन् । उपभोक्ता नठगिउन भनेर सबै व्यवसाय, फर्ममा नियमित अनुगमन गरिने उनले जानकारी दिइन् । 

अनुगमनका क्रममा विकानेर स्विट होम, पंकज किराना स्टोर, बैद्यनाथ आयुर्वेदिक औषधि, श्याम सुन्दर ट्रेडर्समा म्याद नाघेका र खान अयोग्य सामान भेटिएको थियो । यस्तै जुत्ता पसल भानुदय ट्रेडर्स र दिनेश इम्पोरियममा खरिदमूल्य भन्दा तेब्बर बढी मूल्यमा बिक्री गरिएको पाइएको थियो ।

महानगरले विभिन्न सूचक तय गरेर बजारको अनुगमन गरिरहेको प्रमुख प्रशासकिय अधिकृत कुमारप्रसाद दाहाल बताए । कतिपय स्थानमा  उपभोक्ता ठग्ने मनसाय पाइएकाले त्यस्ता व्यापारीलाई कारबाही गरिने दाहालले जानकारी दिए ।