काठमाडौं– दिवंगत कांग्रेस नेता चक्रप्रसाद बाँस्तोलाको पार्थिव शरीरलाई श्रद्धाञ्जलीका लागि पार्टी कार्यालयमा राखिने भएको छ । कांग्रेस प्रवक्ता विश्वप्रकाश शर्माका अनुसार बाँस्तोलाको पार्थिव शरीर अपरान्ह १ः३०–४ः०० बजेसम्म श्रद्धाञ्जलीका लागि पार्टी केन्द्रीय कार्यालय सानेपामा राखिने छ । त्यसपछि पशुपति आर्यघाटमा अन्त्यष्टि गर्ने तयारी छ ।

यसैबीच, कांग्रेस केन्द्रीय समितिको आकस्मिक बैठक दिउँसो दुई बजे बस्ने भएको छ । नेता बाँस्तोलाको निधनमा शोक र श्रद्धाञ्जली व्यक्त गर्न आकस्मिक बैठक डाकिएको प्रवक्ता शर्माले ट्वीट मार्फत जानकारी गराएका छन् । 

यसैगरी, आजका लागि पुर्वनिर्धारित ७७ जिल्लामा मूल्यवृद्धि नियन्त्रणको माग गर्दै ज्ञापनपत्र बुझाउने कार्यक्रम पनि स्थगित भएको उनले बताए । शनिबार राति खुमलटारस्थित निवासमा निधन भएका बास्तोलाको आइतबार अपराह्न ४ बजेपछि अन्त्येष्टि गरिने कार्यक्रम रहेको छ । 

१४ पुस ०६९ मा विराटनगरको बन्धु भेलामा सहभागी हुने क्रममा ब्रेन अट्याक भएका बाँस्तोला त्यसयता अचेत थिए । २०४८ सालमा भारतका लागि नेपाली राजदूत रहेका बाँस्तोला ०५८ सालमा गिरिजाप्रसाद कोइराला नेतृत्वको सरकारका परराष्ट्रमन्त्री थिए ।