सुर्खेत- सुर्खेतको वीरेन्द्रनगर नगरपालिकासँग सिमाना जोडिएको दैलेखको गुराँस गाउँपालिकालाई तरकारीको राजधानीको रुपमा लिने गरिएको छ ।

गुराँस गाउँपालिकाको वडा नं. ४ को गुराँसे अर्गानिक तरकारीका लागि प्रख्यात ठाँउ हो । करिब १५० घरधुरी रहेको सो ठाउँका हरेक किसानले तरकारी खेती गर्दै आइरहेका छन् । उनीहरुले तरकारी खेती मात्रै गरेर राम्रो आम्दानीसमेत लिइरहेका छन् ।

गुराँसेका कृषकहरुलाई बजारको समस्या नै छैन ।

सुर्खेत–देलेख सडकखण्ड सञ्चालनमा आएदेखि उनीहरुको जीवनशैलि नै बदलिएको छ ।

भुमिसरा ढकालले तरकारी खेति गर्न लागेको ६ बर्ष भएको छ । उनको बारिमा अहिले काउली, बन्दा र आलु छ । उनले अन्य खेती गर्न छोडेकी छिन् । ‘हामीले मौसमी तरकारी मात्रै उत्पादन गर्ने गरेका छौं ’ उनले भनिन्, ‘तरकारी खेतीबाट हामीले वर्षेनी चार लाख भन्दा बढी बचत गर्ने गरेका छौं ।’ अर्का कृषक चुडामणि ढकाल पनि तरकारी खेती गरेरै जिविकोपार्जन गर्दछन् । ‘पाखुरा चलाएको खण्डमा नेपालमै सुन फलाउन सकिन्छ भन्ने हामीले गरेर देखाएका छौं’ उनले भने, ‘अहिले मैले ५ रोपनी जग्गामा तरकारी खेति गरिरहेको छु । कम्तिमा पनि तीनलाख यो सिजनमा नाफा हुने अपेक्षा छ ।’

उनले आलुको सिजनमा ४ लाख रुपैंयाँ कमाएको बताए ।

‘मैले आलुको सिजनमा ४ लाख भन्दा बढी रकम बैंकमा जम्मा गर्न सफल भएको छु ।’ उनले गाउँकै अन्य ४ जनालाई रोजगार समेत दिएका छन् । ‘गुराँसेको आलु, तरकारी जुम्ला, मुगुसम्म जाने गर्दछ ।’ स्थानीय व्यापारी अर्जुन शाहीले भने, ‘यहाँ फलेको सबै तरकारी विक्री गर्न कते जानैपर्दैन । सडकमा आएर विक्री गरेपनि सहजै बिक्री हुने गर्दछ ।’