काठमाडौं — अमेरिकाका राष्ट्रपति डोनल्ड ट्रम्पले जलवायु परिवर्तनको कुरा उठाउने वैज्ञानिकहरूसँग राजनीतिक एजेन्डा भएको आरोप लगाउँदै पृथ्वीको बढ्दो तापक्रमका लागि मानिसहरू जिम्मेवार रहेको विषयमा शंका व्यक्त गरेका छन् । 

तर जलवायु परिवर्तन हौवा मात्र रहेको कुरामा आफूले विश्वास गर्न छोडेको पनि उनले बताए ।

सीबीएस टीभीको ६० मिनेट कार्यक्रममा अन्तर्वार्ता दिँदै उनले यो टिप्पणी गरेका हुन् । अघिल्लो हप्ता मात्र जलवायु वैज्ञानिकहरूले बढ्दो तापक्रम घटाउनका लागि अन्तिम आह्वान गरेका थिए । 

विश्वका अग्रणी वैज्ञानिकहरू जलवायु परिवर्तन मानवसिर्जित कुरा भएको मान्छन् । 

जलवायु परिवर्तनको अध्ययन गरेको राष्ट्रसंघीय प्यानलले विश्व ३ डिग्री सेल्सियसको तापक्रम वृद्धितर्फ बढिरहेको चेतावनी दिएको छ ।

आइतवारको अन्तर्वार्तामा ट्रम्पले कुनै पनि परिवर्तन गर्ने विषयमा शंका व्यक्त गरे र वैज्ञानिकहरूसँग ठूलो राजनीतिक एजेन्डा रहेको बताए ।

‘जलवायु परिवर्तन हौवा मात्र होइन रहेछ, त्यसमा सम्भवतः भिन्नता छ,’ उनले पत्रकार लेस्ली स्टाललाई बताए । 

‘तर यो मानवनिर्मित हो भन्ने मलाई लाग्दैन । म यो भन्छु । म खर्बौं खर्ब डलर दिन चाहन्नँ । म लाखौं लाख रोजगारी गुमाउन चाहन्नँ । म घाटाको स्थितिमा बस्न चाहन्नँ ।’

तापक्रम पहिलेकै स्थितिमा पुग्ने ट्रम्पले थपे तर यो कसरी हुन्छ भन्ने बताएनन् । 

बीबीसीबाट