प्यूठान – गाउँगाउँमा सहकारी संस्था गठन र परिचालनपछि आर्थिक कारोबारमा महिलाको अधिकार र पहुँचका साथै महिला उद्यमशीलता पनि बढेको छ । 

‘घरभित्रको सम्पूर्ण कामको जिम्मेवारी हामी महिलाहरूको हुन्थ्यो सबै आर्थिक कारोबार पुरुषले नै गर्दथें,’ सहकारी संस्थाबाट ऋण लिई वर्षको उत्कृष्ट उद्यमीको रुपमा पुरस्कृत भएकी प्यूठान नगरपालिका–४ निवासी सुन्तली घर्तीमगरले भने, ‘सहकारीले मलाई सफल उद्यमी बनायो ।’

गाउँगाउँमा सहकारी संस्था गठन, परिचालन र महिला लक्षित उद्यम विकासमा प्राथमिकता दिई कार्यक्रम सञ्चालन गरिएकाले उनीहरूको आर्थिक कारोबारमा अधिकार र पहँुच बढेको हो । साविकको खैरा गाविसका २५ युवाले मासिक १ सय रुपैयाँ बचत गर्न शुरू गरी गठन भएको फूलबारी बचत तथा ऋण सहकारी संस्था लिको हाल कूल पूँजी १० करोड ८२ लाख रुपैयाँ पुगेको संस्थाका सचिव मोहन सुवेदीले प्रतिवेदन प्रस्तुत गरे । 

३ हजार ९ सय ८३ सदस्य भएको सहकारीमा २ हजार ४ सय ६१ महिला सदस्य छन् । ६१ प्रतिशतभन्दा बढी महिला सदस्य भएको सहकारी संस्थामा ८ करोड ३४ लाख ८९ हजार ३ सय रुपैयाँ निक्षेप रहेको संस्थामा ५० प्रतिशतभन्दा बढी महिलाकै निक्षेप रहेको बताइएको छ । 

संस्थाले आफ्ना सदस्यका लागि २ लाख रुपैयाँको दुर्घटना बीमा सुविधा प्रदान गर्ने बताएको छ । संस्थाको कार्य क्षेत्रभित्र विवाह गरेर आउने नयाँ दुलहीलाई स्वागत गर्ने र महिला सदस्य सुत्केरी हुँदा पौष्टिक आहार र नवशिशुलाई भोटो लगेर घरमै स्वागत गर्ने लगायत नयाँ कार्यक्रम अगाडि बढाएको छ । 

जिल्ला सहकारी संघमा आवद्ध ९६ र जिल्लामा रहेका करीब २ सयभन्दा बढी सहकारी संस्थामा महिला सदस्य नै बढी देखिन्छन् । सहकारी संस्थामा महिलाको उपस्थिति बाक्लो हुनाले महिला सशक्तीकरण र उद्यमशीलतामा वृद्धि भएको कार्यक्रममा उपस्थित सहकारी अगुवाको भनाइ छ ।