काठमाडौं – असोज मसान्तसम्म मुलुकभरका ७७ जिल्लाका जिल्ला जनस्वास्थ्य, स्वास्थ्य कार्यालय यथावत् रहने या प्रदेशमा गाँभ्ने विषयमा सरकारले मंगलबारसम्म कुनै निर्णय नगरेकामा नेपाल जनस्वास्थ्य संघले यथाशीघ्र निर्णयका लागि सरकारको ध्यानाकर्षण गराएको छ । 

गत बैशाख र असार महिनामा गरी २ पटक स्वास्थ्य तथा जनसंख्या मन्त्रालयले ३–३ महिनाको म्याद थप्दै हाल जिल्ला स्वास्थ्य कार्यालय र जिल्ला जनस्वास्थ्य कार्यालय यथावत् रहने गरी निर्णय गरेको थियो । गत असारमा ३ महिनाका लागि थपिएको म्याद बुधबार सकिने भएकाले त्यसपछि के हुन्छ भन्ने विषयमा अन्योल छाएको छ । 

नेपाल जनस्वास्थ्य संघका नवनिर्वाचित अध्यक्ष श्रीकृष्ण भट्टद्वारा जारी गरिएको विज्ञप्तिमा मंगलबार या बुधबारसम्म सो विषयमा तत्काल निर्णय गरी यसबारे देखिएको अन्योलको अन्त्य गर्न सरकारसँग आग्रह गरिएको छ । 

संघका नवनिर्वाचित महासचिव धादिङ जिल्लाका वरिष्ठ जनस्वास्थ्य प्रशासक महेश्वर श्रेष्ठले कुनै पनि हालतमा सरकारले बुधबारसम्म यसबारे निर्णय नगरेमा सबै जिल्लाका जिल्ला स्वास्थ्य जनस्वास्थ्य कार्यालय, मेडिकल स्टोर, क्षेत्रीय प्रयोगशाला र तालिम केन्द्रका काम ठप्प हुने बताए ।