बर्दिवास – महोत्तरी जिल्लाको बर्दिवास नगरपालिकाले बडादशैंको अवसर पारेर ७ दिने योग शिविर आयोजना गरेको छ ।

बडादशैंको फूलपातीको दिन पारेर मंगलबार नगरपालिकाले बर्दिवासमा आयोजना गरेको ७ दिने योग शिविरको शिक्षा, विज्ञान तथा प्रविधिमन्त्री गिरिराजमणि पोखरेलले आफैं योग साधनामा सामेल भएर शुभारम्भ गरे ।

सो अवसरमा मन्त्री पोखरेलले योगले शरीर मात्र नभई मन, विचार र कामप्रतिको लगनलाई पनि स्वस्थ्य राख्ने बताए । सद्विचार, सद्आचरण र सत्कर्म अवलम्वनमा योगले सघाउने उनको भनाइ छ । 

‘योगले मानव मन र शरीरलाई जोड्ने कुरा विज्ञानले पुष्टि गरेको छ,’ मन्त्री पाखरेलले योग शिविरमा सहभागीलाई हौंस्याउँदै भने, ‘अब योगलाई शिविरमा मात्र होइन, आफ्नै घरमा नियमित दैनिक तालिकामा गाँभ्नुहोस् ।’ वर्तमान सरकारले योगलाई उच्च प्राथमिकतामै राखेर अब माध्यमिक तहको पठनपाठनमा पाठ्यक्रममै राख्न लागेको उनले बताए ।

विश्व स्वास्थ्य संगठनले ६२ प्रतिशत नसर्ने रोगको भयानकता बताएकोतर्फ इङ्गित गर्दै योगले यो भयानकता नियन्त्रण गर्ने मन्त्री पोखरेलको भनाइ थियो । 

योग शिविरमा बर्दिबास नगरपालिकाका प्रमुख विदुरकुमार कार्कीले अब योगलाई अभियानकै रूपमा नगर क्षेत्रमा निरन्तरता दिइने बताए । काठमाडौं इन्जिनियरिङ कालिमाटीका योग शिक्षक शान्त खरेलले योग शिविरमा प्रशिक्षण दिइरहेका छन् । पहिलोपटक आयोजित शिविरमा ५० जना सहभागी छन् ।