उत्तरी आयरल्यान्डकी आन्ना बर्न्सले जितिन् यस वर्षको बूकर पुरस्कार

असोज ३१, २०७५

काठमाडौं — आख्यान क्षेत्रको प्रतिष्ठित बूकर पुरस्कार यो वर्ष आन्ना बर्न्सले पाएकी छन् । 

उपन्यास मिल्कम्यानका लागि उनले यो पुरस्कार पाएकी हुन् । बूकर पाउने उनी उत्तरी आयरल्यान्डकी पहिलो लेखक हुन् । 

आन्नालाई ५२ हजार ५०० पाउन्ड राशिको पुरस्कार मंगलवार लन्डनमा आयोजित एक समारोहमा दिइएको हो । बूकरको ४९ वर्षे इतिहासमा पुरस्कार पाउने आन्ना १७औं तथा सन् २०१३ पछि पहिलो महिला हुन् । 

मिल्कम्यानमा एक युवती विवाहित पुरुषसँगको प्रेममा पर्छिन् । त्यसपछि दुवैले उत्तरी आयरल्यान्डमा राजनीतिक गतिरोधको सामना गर्नुपर्ने हुन्छ । 

पुरस्कार दिने प्यानलका एक सदस्य क्वामे एन्थोनी अप्पियाहले भने, ‘आन्नाले आफ्नो किताबमा लेखेको कुरा हामीले यसअघि कहिले पनि पढेका थिएनौं । उनले आफ्नो लेखनमा पारम्परिक सोचलाई चुनौती दिएकी छन् । यो उपन्यास
क्रूरता, यौन अतिक्रमण र हास्यका साथ प्रतिरोधको कथा हो । यसले विभाजित समाजमा मानिसको कपटतापूर्ण रूपको खोजी गर्छ ।’

पुरस्कारका लागि बेलायतका दुई, अमेरिकाका दुई र क्यानडाका एक लेखकसँग आन्नाको प्रतिस्पर्धा थियो । 

डेजी जोनसन बूकरमा नामांकित भएकी सबभन्दा युवा लेखिका थिइन् । उनको उपन्यास एभ्रिथिङ अन्डर अन्तिम सूचीमा परेको थियो ।

एजेन्सी 
 


ADVERTISEMENT

असोज ३१, २०७५ मा प्रकाशित

प्रतिक्रिया दिनुहोस