काठमाडौं – उर्जा, जलस्रोत तथा सिँचाइमन्त्री वर्षमान पुन र चिनियाँ उपमन्त्री लियाङ्ग विलियाङ्गबीच भेटवार्ता भएको छ ।

चीनले अघि सारेको वान वेल्ट वान रोडको उर्जा मन्त्रीस्तरीय बैठकमा भाग लिन चीनको सुजोओ पुगेका मन्त्री पुनसँग शुक्रवार उपमन्त्री लियाङ्गले भेटवार्ता गरेका हुन् ।

लियाङ्ग चीनको विकास र सुधार हेर्ने विभागका उपमन्त्री हुन् । उनी त्यसका साथै चीनको वित्तीय क्षेत्रको समन्वय गर्ने विभागका प्रमुख समेत हुन् । भेटवार्तामा आपसी हित र उर्जाको क्षेत्रमा दुई देशको बीचमा गर्न सकिने सहकार्यबारे समेत छलफल भएको थियो । 

द्विपक्षीय भेटवार्तामा मन्त्री पुनले नेपाल र चीनबीच निकै पुरानो सम्बन्ध रहेको चर्चा गर्दै आगामी दिनमा समेत दुवै देशको सम्बन्ध मजबुत बन्ने धारणा राखे । नेपालमा लामो समयपछि दुईतिहाईको सरकार बनेको भन्दै उनले त्यसमा चीनको सहयोग र सद्भावको खाँचो रहेको बताए ।

मन्त्री पुनले चिनियाँ उपमन्त्रीसँग प्रधानमन्त्री केपी शर्मा ओलीको गत जुनमा भएको भ्रमणको बेला इनर्जी कोअपरेसनमा भएको सम्झौता ऐतिहासिक भएको भन्दै आगामी दिनमा त्यसमार्फत् सहकार्य गर्न सजिलो हुने धारणा राखे ।

उनले गत महिना बंगलादेशसंग समेत इनर्जी कोअपरेसनमा सम्झौता भइसकेको भन्दै त्यसले क्षेत्रीय बजार विस्तारमा सहयोग पुग्ने दाबी गरे । उनले बंगलादेशले नेपालमा उत्पादन भएको बिजुली खरिद गर्न ईच्छा व्यक्त गरेको जानकारी समेत दिए ।

मन्त्री पुनले गत सेप्टेम्बरमा नेपाल र चीनबीच बनेको उर्जा संयन्त्रको पहिलो बैठक बसिसकेको जानकारी दिँदै दोस्रो बैठकको मिति समेत छिट्टै तय गर्न आग्रह गरे । संयन्त्रको पहिलो बैठक आफैंमा ऐतिहासिक बनेको भन्दै त्यसमार्फत् दुवै देशले उर्जा क्षेत्रमा सहकार्य गर्न सजिलो हुने मन्त्री पुनको धारणा थियो ।  

बैठकमा मन्त्री पुनले नेपाल चीनबीच अघि बढेको अन्तरदेशीय प्रशारण लाइन र जलविद्युत् परियोजनाबारे छलफल भएको थियो । मन्त्री पुनले ४ सय केवीको काठमाडौं केरुङ अन्तरदेशीय प्रशारण लाइन, कोशी कोरिडोर, कर्णाली कोरिडोर र भेरी कोरिडोर, किमाथांका, फुक्कोट कर्णाली र तमोर जलविद्युत् परियोजना नेपालको प्राथमिकतामा रहेको भन्दै उनले त्यसमा चीन सरकारको सहयोग आवश्यक रहेको धारणा राखे । परियोजना सरकारले चीनसमक्ष यसअघि नै प्रस्ताव गरिसकेको छ ।

छलफलमा सोफ्ट लोन, कमर्सियल लोन र बीआरआई फण्डमार्फत् गर्न सकिने लगानीका सम्भावनाबारे समेत छलफल भएको थियो । नेकपाका नेता समेत रहेका मन्त्री पुनले नेपालमा चिनियाँ लगानी दिन प्रतिदिन बढिरहेको जानकारी दिँदै आगामी दिनमा समेत लगानीको वातावरण बनाइदिन आग्रह गरे । 

भेटमा चिनियाँ मन्त्री लियानले नेपालसँग भएको इनर्जी कोअपरेसनको समझदारी कार्यान्वयन गर्ने चरणमा रहेको जानकारी दिए । मन्त्री लियानले भेटमा नेपाल चीनबीच बनेको उर्जा संयन्त्रको पहिलो बैठक ऐतिहासिक भएको भन्दै त्यसका लागी पहल गरेकोमा उर्जामन्त्री पुनलाई धन्यवाद व्यक्त गरे ।

उनले नेपालमा चिनियाँ कम्पनीले उर्जा क्षेत्रमा लगानी गरिरहेको भन्दै आगामी दिनमा समेत लगानी थप विस्तार हुने प्रतिवद्धता व्यक्त गरे । ‘हामीलाई चीनमा थप उर्जा समेत आवश्यक छ, नेपालमा हाम्रा कम्पनीहरूले व्यावसायिक रुपले लगानी गरिरहेका छन्, आगामी दिनमा थप चिनियाँ कम्पनीले नेपालमा लगानी गर्नेछन््,’ उपमन्त्री लियानले भने ।