बेत्रावती – नुवाकोटको विदुर नगरपालिकाका प्रमुख सञ्जु पण्डितले एक अशक्त व्यक्तिलाई मासिक २ हजार रुपैयाँका दरले ३० हजार रुपैयाँ उपलब्ध गराएको छ । 

आफू प्रमुख पदमा निर्वाचित भएर शपथ लिएपछि राज्यबाट जनप्रतिनिधिको हैसियतमा प्राप्त सुविधाबाट उनले विदुर नगरपालिका–९ लामाटारका न्यून दृष्टियुक्त व्यक्ति (दुवै आँखा नदेख्ने) कृष्णबहादुर नेपालीलाई रकम उपलब्ध गराएका हुन् ।

‘यो सेवा आफू जनप्रतिनिधि रहुञ्जेल राज्यबाट प्राप्त हुने सुविधाबाट कटौती गरी प्रदान गर्ने भनेर जनाएको प्रतिबद्धता कार्यान्वयनमा ल्याएको छु,’ प्रमुख पण्डितले भने, ‘अब निरन्तर मासिकरुपमा रकम उपलब्ध गराउने छु ।’

जग्गा तथा सम्पत्ति केही नभएको नेपालीले वृद्ध बुवा र शारीरिकरुपमा अशक्त पत्नीको पालनपोषण गर्दै आएका छन् । ‘सामाजिक सुरक्षा भत्ताबाट आउने पैसाले परिवार पाल्न गाह्रो थियो,’ नेपालीले भने, ‘प्रमुखले दिनुभएको पैसाले चामल किन्न पुग्ने भएको छ ।’