कञ्चनपुर – कञ्चनपुरको शुक्लाफाँटा नगरपालिका वडा नम्बर ४ को कार्यालयमा नगरस्तरीय दलित जनजाति संयुक्त संघर्ष समितिले १ साताअघि गरेको तालाबन्दी आइतवार खोलिएको छ । 

नगरपालिकाका नगर प्रमुख दीलबहादुर ऐर, वडा अध्यक्ष, सुरक्षा निकायका प्रतिनिधि र संघर्ष समितिका पदाधिकारीबीच २ बुँदे सहमतिपश्चात् ताला खोलिएको हो । 

राष्ट्रिय माध्यमिक विद्यालयमा रिक्त दरबन्दीमा शिक्षक सरुवाका विषयमा विवाद हुँदा दलित संघर्ष समितिले वडा कार्यालयमा तालाबन्दी गरेको थियो । ‘शिक्षक सरुवाका लागि नगरपालिकाको कार्यपालिका र नगरशिक्षा समितिले कार्य अगाडि बढाउने र सहजरुपमा सेवा उपलबध गराउनका लागि ताला खोल्ने निर्णय गरेको छ,’ वडा अध्यक्ष ज्ञानबहादुर विष्टले भने । 

‘नपाका विषयगत कार्यालयमा संविधानमै व्यवस्था भएको समानुपातिक समावेशीताको कुरा लागू नभएपछि तालाबन्दी गरेका हौं,’ संघर्ष समितिका सदस्य सिवी लुहारले भने । नगरपालिकाका नगर प्रमुखले समावेशीताको कुरा लागू गर्ने प्रतिबद्धता जनाएपछि तालाबन्दी खोलिएको उनले बताए ।

छलफलपश्चात् वडा कार्यालयमा लगाइएको ताला संघर्ष समितिका अध्यक्ष गोविन्द नेपाली आफैंले तोडेका छन् । वडा नम्बर ४ मा रहेको दलित शिक्षकको सरुवाको विषयलाई लिएर गत असोज २८ गते संघर्ष समितिले दोस्रो पटक तालाबन्दी गरेको हो । त्यसअघि लगाइएको ताला जनप्रतिनिधिको रोहवरमा तोडिएको थियो ।