जापान – नेपाली कांग्रेसका केन्द्रीय सदस्य प्रदीप पौडलले विवेकशून्य वर्तमान सरकारमा जवाफदेहीताको चरम अभाव रहेको आरोप लगाएका छन् । 

नेता पौडेलले सरकारका पछिल्ला काम कारवाहीका कारण आमजनतामा चरम निराशा छाएको समेत दाबी गरे ।

जापानको राजधानी टोकियोमा जनसम्पर्क समिति जापानले गरेको अन्तक्र्रियामा पौडेलले वाइडबडी विमान खरिद प्रकरण तथा बुढीगण्डकी परियोजना बिना टेण्डर चीनको गेजुवा कम्पनीलाई दिने सरकारी निर्णयप्रति कडा आपत्ति जनाए । ‘यस्ता विवादास्पद विषयमा जनस्तरबाट पटक–पटक आइरहेका टिकाटिप्पणीलाई सही सम्बोधन नगरी सरकारले जवाफहीन संस्कृतिलाई प्रश्रय दिएको छ,’ पौडेलले भने ।

बढ्दो भ्रष्टाचार, चरम महंगी, कमजोर सुरक्षा व्यवस्था, फितलो प्रशासनका कारण जनता वाक्क–दिक्क भइसक्दा समेत दुईतिहाई बहुमत रहेको वर्तमान सरकारले केही गर्न नसक्नु ठूलो लज्जाको विषय रहेको पौडेलले बताए ।

जनतालाई भुलभुलैयामा पार्न वर्तमान सरकारले चीनबाट रेल ल्याउने, पानीजहाज कुदाउने, हावाबाट बिजुली निकाल्नेजस्ता कोरा नाराहरू दिइहेपनि अहिलेसम्म ती विषयमा कुनै ठोस योजना ल्याउन नसकेको उनले बताए ।

बेग्लै प्रसङ्गमा पौडेलले नेपालको सन्दर्भमा लोकतन्त्र र नेपाली कांग्रेस एकअर्काका पर्याय रहेको भन्दै कांग्रेसले मात्र देशको विकास गर्न सक्ने दाबी गरे । व्यक्तिवादी प्रवृत्ति हावी हुँदा विगतमा कांग्रेसबाट पनि गल्ती भएको स्वीकार गर्दै उनले पार्टी शुद्धीकरणको विकल्प नहरेको तर्क गरे । नेपालको राजनीति सैद्धान्तिक पक्षबाट स्खलित भइरहनु ठूलो चिन्ताको विषय भएकाले योग्य मतदाताले योग्य नेतृत्व चुन्नुको विकल्प नभएको उनले बताए ।

राजनीतिलाई व्यवस्थासँग मात्र तुलना गर्ने सोच नै गलत रहेको भन्दै उनले राजनीतिलाई अब आर्थिक, सामाजिक, सांस्कृतिक, भौगोलिक लगायतका पक्षबाट समेत हेरिनुपर्ने धारणा राखे । उनले प्रवासमा रहेका नेपालीलाई घरजग्गा खरिदमा नभई राष्ट्रिय अर्थतन्त्रमा टेवा पुग्ने गरी उत्पादनमूलक क्षेत्रमा लगानी गर्न आग्रह गरे । ‘विदेशमा बसेका नेपालीले पैसा मात्र कमाएका छैनन्, प्रविधि र सीप पनि सिकेका छन्, अब त्यस्तो प्रविधि र सीपको प्रयोग स्वदेशमै हुनुपर्छ र विदेशीका युवालाई स्वदेश फर्काउनुपर्छ,’ पौडेलले भने ।

४० वर्षमुनिका व्यक्तिको योगदानका कारण नै चीन र भारतले हरेक क्षेत्रमा अभूतपूर्व विकास गरेको दृष्टान्त दिँदै उनले नेपालका त्यस्ता बहुसंख्यक युवा भने विदेशी भूमिमै परिश्रम गर्न बाध्य भएपछि कसरी मुलुक समृद्ध हुन्छ भनी प्रश्न गरे ।

विद्यार्थी राजनीतिमार्फत् पहिचान बनाई राष्ट्रिय राजनीतिमा सक्रिय पौडेलको स्वागतका लागि गैरआवासीय नेपाली संघका केन्द्रीय अध्यक्ष भवन भट्ट स्वयम् विमानस्थल पुगेका थिए । प्रवासी नेपालीमाझ लोकप्रिय पौडेल नेविसंघका पूर्वअध्यक्ष हुन् ।