दैलेख – जिल्लाको आठबीस नगरपालिका क्षेत्रको सुरक्षाको जिम्मा लिएको ईलाका प्रहरी कार्यालयको भवन जीर्ण अवस्थामा पुगेको छ ।

राकम कर्णालीमा हावा चल्दा प्रहरीको कार्यालय भवन हल्लिने गरेको छ भने थोरै पानी पर्दा पनि चुहिने गरेको छ । २५ जनाको दरबन्दी रहेको कार्यालयमा हाल १२ जना सुरक्षाकर्मी खटिएका छन् ।

आठबीस नगरपालिकाका करीब २५ हजारभन्दा बढी जनतालाई सुरक्षाको प्रत्याभूति दिनुपर्ने बाध्यता कार्यालयको रहेको प्रहरी सहायक निरीक्षक दिपेन्द्र चौधरीले बताए ।

उनका अनुसार भवनमा पर्याप्त कोठा समेत छैनन् । भाडाको भवनमा प्रहरी कार्यालय वर्षौंदेखि सञ्चालनमा रहेको छ । ‘६ वटा कोठा रहेको भवनमा थुनुवा राख्ने कोठामै कार्यालय सञ्चालन गरिरहेका छौं,’ उनले भने, ‘प्रहरी सुत्नका लागि जम्मा ३ वटा कोठा रहेका छन् । एउटा कोठामा भान्सा बनाएका छौं ।’

उनले प्रहरीका लागि तत्काल एक सुरक्षित भवनको आवश्यकता रहेको बताए । ‘हामीलाई अहिले एउटा भूकम्प प्रतिरोधी भवनको आवश्यकता छ,’ उनले भने, ‘जोखिमपूर्ण अवस्थामा बसेर सुरक्षा दिन हामीलाई साह्रै गाह्रो भएको छ ।’

जिल्ला प्रहरी कार्यालय दैलेखका डीएसपी ठाकुरप्रसाद पोखरेलले भवन निर्माण कार्य प्राथमिकतामा रहेको बताए । ‘हामीले भवनका लागि आवश्यक बजेट माग गरेका छौं,’ उनले भने, ‘यदि बजेट आएको खण्डमा प्रहरी कार्यालयको भवन निर्माण गर्नेछौं ।’

डीएसपी पोखरेलले अबको डेढ हप्ताभित्र ७ जना प्रहरी थप गर्ने बताए । ‘हामी अन्यत्रबाट भएपनि प्रहरी आठबीसमा पठाउने तयारीमा छौं,’ उनले भने, ‘त्यो हाम्रो प्राथमिकतामा छ ।’