काठमाडौं – सप्तरी, धनुषा र सिन्धुपाल्चोकमा सोमबार भएका छुट्टाछुट्टै सवारी दुर्घटनामा ४ जनाको मृत्यु भएको छ भने अन्य ३४ जना घाइते भएका छन् ।

सप्तरी अग्नीसाईर कृष्णसवरण गाउँपालिका–१ जन्डोलस्थित सडकमा बा५ख १४५१ नम्बरको माईक्रोबसले सोही स्थान बस्ने पैदलयात्री ६० वर्षीय अन्दुलाल चौधरीलाई ठक्कर दिंदा घटनास्थलमै मृत्यु भएको छ । फरार चालकको प्रहरीले खोजी गरिरहेको छ ।

यसैगरी सप्तरी शम्भुनाथ नगरपालिका–७ देवधारस्थित सडकमा ना४ख ४४७० नम्बरको बस अनियन्त्रित भई सडकबाट अन्दाजी ६ मिटर तल खसेर दुर्घटना हुँदा घाइते भएका बसका सहचालक काभ्रे घर भएका ४५ वर्षीय दिपक राईको सप्तऋषि अस्पताल लाहानमा उपचारको क्रममा मृत्यु भएको छ । 

दुर्घटनामा घाइते भएका अन्य ८ जनाको खर्चुहिया पोलिक्लिनिकमा उपचार भइरहेको छ । फरार चालकको प्रहरीले खोजी गरिरहेको छ ।

धनुषा जनकपुर उपमहानगरपालिका–१४ मुजेलियास्थित सडकमा लक्ष्मीनियाँबाट जनकपुरतर्फ जाँदै गरेको ज१त ११३ नम्बरको ट्याक्टरले ज९प ६१३३ नम्बरको स्कुटरलाई ठक्कर दिंदा घाइते भएका स्कुटरमा सवार सोही उपमहानगरपालिका देबिचोक बस्ने २८ वर्षीय सन्दिप नायकलाई उपचारको लागि लैजाने क्रममा बाटोमै मृत्यु भएको छ । ट्याक्टर र ट्याक्टर चालकलाई प्रहरीले नियन्त्रणमा लिएको छ ।

सिन्धुपाल्चोक चौतारा साँगाचोकगढी नगरपालिका–९ भैसे बजारस्थित सडकमा बा४ख ९०१७ नम्बरको मिनिट्रक अनियन्त्रित भई सडकको छेउमा पल्टिदा ट्रकमा सवार बारा जितपुर सिमरा उपमहानगरपालिका–१७ बस्ने ३६ वर्षीय लुते तामाङको घट्नास्थलमै मृत्यु भएको छ । 

दुर्घटनामा ट्रकमा सवार २६ जना घाइते भएकोमा १२ जनाको सिन्धु सदाबहार अस्पताल खाडिचौरमा उपचार भइरहेको र १४ जनालाई उपचारको लागि काठमाडौं लगिएको छ । दुर्घटनाका सम्बन्धमा स्थानीय प्रहरीले आवश्यक अनुसन्धान गरिरहेको छ ।