भक्तपुर – दशैंको महाअष्टमीका दिन चाँगुनारायण नगरपालिका वागिश्वरीका ४४ वर्षीय रामकृष्ण गिरी देब्रे छाती दुखेपछि उपचारका लागि भक्तपुर अस्पताल आए ।

बिदाको दिनमा ओपीडी सेवा बन्द हुने भएपछि आकस्मिक कक्षमा रहेका चिकित्सकलाई स्वास्थ्य परीक्षण गराए । स्वास्थ्य परीक्षणमा संलग्न चिकित्सकले देब्रे छाती दुखेको ग्यास्ट्रिकका कारणले भन्दै ग्यास्ट्रिकको औषधि दिएर पठाए ।

भोलिपल्ट फेरि छाती दुखेर मध्यपुर अस्पताल पुग्दा मुटुको सबै उपचार सेवा छ भनेर प्रचार गर्दै आएको अस्पतालले पनि इसीजी गरेर बिरामी बचाउन आवश्यक थप उपचार नगरी सिधै गंगालाल अस्पताल रिफर गरेपछि गंगालाल पुर्याउँदा उनको निधन भयो । हृदयाघातकै कारण निधन भएको गंगालाल अस्पतालले पुष्टि गर्यो । 

उपचारका लागि शुरूमा आएको भक्तपुर अस्पतालका चिकित्सकको लापरवाहीले ज्यानै गएको स्थानीय बासिन्दा बताउँछन् । पीडित परिवारले भने भक्तपुर अस्पतालले इसीजी गरेर गंगालाल अस्पताल लैजान सुझाब मात्रै दिएको भएपनि ज्यान बचाउन सकिनेमा चिकित्सकले बिरामीलाई गम्भीर रुपमा नलिँदा ज्यान गएको गुनासो गरेका छन् । 

हृदयाघातको लक्षण देखिँदा देखिँदै पनि अस्पतालमा भएको इसीजी सेवा उपलब्ध नगराई ग्यास्ट्रिक भनेर औषधि दिएर पठाउनु चिकित्सकको चरम लापरवाही भएको स्थानीयवासीको भनाइ छ । 

अस्पतालका सुपरिन्टेन्डेन्ट डा. सुधार देवकोटासँग सम्पर्क गर्न खोज्दा उनी बिदामा भएको अस्पतालका प्रशासन प्रमुख विश्व न्यौपानेले जानकारी दिए । घटना गम्भीर र दुःखद भएको बताउँदै न्यौपानेले भने, ‘मेडिकल सुपरिन्टेन्डेन्ट बिदामा हुनुहन्छ, उहाँ आएपछि घटनाको दिनको चिकित्सकले बिरामी हेरेको हो, अस्पतालमा भएको इसीजी सेवा किन सञ्चालन नगरेको हो, छानबिन गरी विभागीय कारवाही अगाडि बढाउँछौं ।’ 

सरकारको वार्षिक करोडौंको बजेट आउने भक्तपुर अस्पताल र सरकारी तलब खाएर बस्ने यहाँका केही चिकित्सकको यस्तो लापरवाहीको घटना यो पहिलो भने होइन । सरकारी अस्पतालका रुपमा रहेको भक्तपुर अस्पतालले विगतदेखि नै प्रसूतिदेखि विभिन्न रोगको उपचारमा लापरवाही गर्दै आएपछि पछिल्लो समयमा बिरामीको चापसमेत घटेको छ । 

आइसीयू बिना नै विभिन्न रोगको शल्यक्रिया गरेर अर्को लापरवाही गर्दै आएको स्थानीयवासी बताउँछ । आँखा अगाडि नै भक्तपुर अस्पताल रहेपनि यहाँका बासिन्दाले भने उपचार गराउन बिरामीलाई काठमाडौँका अस्पताल लैजाने गरेको दूधपाटीका स्थानीयवासी रामप्रसाद श्रेष्ठ बताउँछन् । भक्तपुरका बासिन्दालाई भक्तपुर अस्पतालको उपचार सेवामा विश्वास नै हट्दै गए पनि बिरामी काठमाडौं लैजान गरेको बताउँछन् ।

उनी भन्छन्, ‘भक्तपुर अस्पताल कहिल्यै नसुध्रिने भो, यहाँको लापरवाही हेर्ने हो भने अनगिन्ती छन् ।’ ज्यान बचाउने अपेक्षा लिएर अस्पताल आउने बिरामीलाई बचाउन भक्तपुर अस्पताल गम्भीर नहुने गरेको स्थानीयवासीको गुनासो छ ।