विराटनगर– जनप्रतिनिधिहरू सुविधाभोगी बन्दै गएको गुनासो बढिरहेका बेला विराटनगर महानगरपालिकाका वडाध्यक्षले दशैं उपहार मोटरसाइकल पाएका छन् । निर्वाचित भएको करिब डेढ वर्षपछि महानगरका वडाध्यक्षहरूले मोटरसाइकल सुविधा लिएका हुन् ।

महानगरपालिकाको १९ वडा मध्ये १८ वडाका अध्यक्षलाई मोटरसाइकल उपहार मेयर भीम पराजुलीले दिएका हुन । वडा नम्बर ११ का अध्यक्ष तीर्थेन्द्र न्यौपानेले भने मोटरसाइकल लिएका छैनन् । आफ्नै मोटरसाइकल भएको बताउँदै उनले मोटरसाइकल सुविधा नलिएका हुन् ।

मेयर पराजुलीले कार्यालय प्रयोजनका लागि वडा कार्यालयहरूलाई मोटरसाइकल वितरण गरिएको जानकारी दिए । आफूले कुनै सुविधा नलिएको बताउँदै उनले वडाका काम छिटो गर्नका लागि मोटरसाइकल प्रदान गरिएको बताए । महानगरको बोर्ड बैठकको निर्णयपछि मोटरसाइकल खरिद गरिएको उनको भनाइ छ ।

महानगरपालिकाले खरिद गरेको मोटरसाइकल २ लाख ८ हजार रुपैयाँदेखि २ लाख ९० हजार रुपैयाँ सम्मका छन् । महानगरका प्रवक्ता राजेन्द्र प्रधानले २ लाख ८ हजार रुपैयाँका होण्डा र २ लाख ९० हजार रुपैयाँका बजाज एभेञ्जर बाइक खरिद गरी वितरण गरिएको जानकारी दिए । सार्वजनिक खरिद ऐन अनुसार खरिद गरिएको बताउँदै उनले वडाध्यक्षलाई कार्यालय प्रयोजनका लागि मोटरसाइकल प्रदान गरिएको बताए।