महेन्द्रनगर – कञ्चनपुरकी १३ वर्षीया बालिका निर्मला पन्तको बलात्कारपछि हत्याको विरोधमा महेन्द्रनगरमा फेरि आन्दोलन तथा बहस शुरू भएको छ ।

घटनाका हत्यारा सार्वजनिक गर्न माग गर्दै सोमवार महेन्द्रनगरमा पीडित परिवार, अधिकारकर्मी लगायतले प्रदर्शन गरेका छन् ।

मीना भण्डारी संयोजकत्वको नागरिक संघर्ष समितिले महेन्द्रनगर बजारको मदनचोकबाट प्रदर्शन गर्दै प्रमुख जिल्ला अधिकारीमार्फत् अल्टिमेटमसहित प्रधानमन्त्रीलाई ज्ञापनपत्र बुझाएको छ । 

हेलन श्रेष्ठ संयोजकत्वको दवाबमूलक संघर्ष समितिले अनुसन्धानमा खटिएका डीएसपी द्वय अंगुर जिसी र ज्ञानबहादुर सेठीलाई पनि सेवाबाट निष्काशन गर्नुपर्ने माग अघि सारेको छ । सोमवार दवाबमूलक संघर्ष समितिले आन्दोलनबारे महेन्द्रनगरमा समीक्षा गर्दै घटनास्थलमा खटिएका कञ्चनपुरका तत्कालीन प्रहरी नायव उपरीक्षक (डीएसपी) सेठी र अनुसन्धानमा खटिएका सीआईबीका अर्का डिएसपी जिसीलाई निष्काशन गर्नुपर्ने माग अघि सारेका हुन् । 

दबाबमूलक संघर्ष समितिका पदाधिकारीले निर्मला हत्याकाण्डको अनुसन्धानमा लापरवाही गरेको भन्दै २ जना स्थानीय प्रहरी अधिकृतलाई निष्काशन गरेर सरकारले वास्तविक हत्यारा लुकाउन खोजेको आरोप लगाएका छन् । घटनालाई मोड्न समेत सरकारले यसै क्षेत्रका स्थानीय प्रहरीलाई निष्काशन गरेको उनीहरूको दावी छ । 

दबाबमूलक संघर्ष समितिका महिला अगुवाले प्रहरीलाई निष्पक्ष ढंगले घटनाको अनुसन्धान गर्न नदिएको दावी गर्दै प्रहरीलाई कुनै शक्तिबाट प्रभावमा पारेको निष्कर्ष छ । प्रहरीलाई अनावश्यक दवाव दिने अनुसन्धानमा हस्तक्षेप गर्नेहरूको पहिचान गरेर कारबाही गर्न समेत उनीहरूले सरकारसँग अनुरोध गरेका छन् । समितिका महिलाले अधिकारका नाममा अनावश्यक जे मनमा लाग्यो, त्यही गर्दा आज अरु महिला पनि अन्यायमा परेको बताएका छन् । 

दबाबमूलक संघर्ष समितिकी सदस्य भुवनेश्वरी कुँवरले आमा समूहका महिलाको २ प्रहरी अधिकृतलाई निष्काशन नभई निर्मलाका वास्तविक बलात्कारी र हत्यारा सार्वजनिकको माग भएको बताईन् । ‘हाम्रो माग कुनै प्रहरीको जागिर खोस्नका लागि होइन,’ उनले भनिन्, ‘हामीले प्रहरीको जागिर खान पनि आन्दोलन गरेका होइनौं ।’

उनले निर्मलाको शुरुवाल पखाल्ने काम डीएसपी सेठी स्वयं उपस्थित भएका बेला भएको दावी गर्दै डीएसपीले प्रमाण नष्ट गरेको आरोप लगाइन् । निर्मलाको हत्यारा पत्ता लगाउँछु भन्दै काठमाडौंदेखि कञ्चनपुर आएको आईजीपी सवेन्द्र खनालले २ प्रहरीलाई जागिरबाट हटाएर अरुलाई बचाउन खोजेकाले हत्यारा संरक्षण गर्न प्रहरी उच्च नेतृत्व लागि गरेको दावी गरिन् । उनले पुरानै प्रहरी टीमबाट पुनः अनुसन्धानमा जोड दिइन् । नयाँ–नयाँ आएका टीमले कुनै काम गर्न नसक्ने भन्दै सरकारले फगतमा नयाँ टीम गठन गरिरहेको टिप्पणी गरिन् । 

महेन्द्रनगरकी अगुवा महिला रञ्जु थापाले अनुसन्धानमा खटिएका पूरै टीम कारबाहीको दायरामा आउनुपर्ने बताइन् । केही रीसइबी भएका व्यक्ति समूहले एसपी विष्ट र इन्सपेक्टर भट्टविरुद्ध नाराबाजी गरेकै आधारमा सरकारले कारबाही गरेर अन्याय गरेको उनको आरोप छ । 

दबाबमूलक संघर्ष समिति कञ्चनपुरकी संयोजक हेलन श्रेष्ठले घटना घटेको ३÷३ महिना बितिसक्दा पनि अझै पनि हत्यारा पत्ता नलागेको भन्दै दुःख व्यक्त गरिन् । अनुसन्धानमा खटिएका २ प्रहरी अधिकृतलाई कारबाही गरेर सरकारले अपराधी लुकाउन खोजेको आरोप लगाइन् । 

उनले नेपालीको महान पर्व तिहार (भाईटिका र छठ) सम्म आन्दोलन स्थगित गरिएको समेत जानकारी गराइन् । तिहारका बेला व्यावसायिक, उद्योगी, स्थानीय सर्वसाधारणलाई मर्का पर्ने मध्यनजर गर्दै आन्दोलन स्थगित गरेको उनको भनाई छ । 

निर्मला पन्तको बलात्कारपछि हत्या भएको झण्डै ३ महिना पुगिसक्दा पनि प्रहरीले वास्तविक हत्यारा पहिचान नै गर्न सकेको छैन । साउन १० गते साथीको घरमा होमवर्क गर्छु भन्दै हिँडेकी निर्मला पन्तको साउन ११ गते बिहान उखुबारीमा शव फेला परेका थियो ।