धनगढी – कैलालीको टीकापुरमा सुकुम्बासीको नाममा कब्जा गरिएको ६ विघा ४ कठ्ठा जग्गा खाली गराइएको छ ।

टीकापुर नगरपालिका–९ पायलगाउँस्थित गोविन्दप्रसाद श्रेष्ठको सो जग्गामा १४६ जनाले बुधबारदेखि त्रिपाल टाँगेर आफूहरूलाई सुकुम्बासी बताउँदै कब्जा गरेका थिए । तर आज सो जग्गा प्रहरी प्रशासन र नगरपालिकाको पहलमा खाली गराइएको हो ।

जग्गा धनी श्रेष्ठको ६ विगाह ४ कठ्ठा जग्गा सुकुम्बासीको नाममा कब्जा गरी बसेकालाई उठ्न लगाई खाली गराएको टीकापुर नगरपालिका–९ का वडा अध्यक्ष लौटन चौधरीले जानकारी दिए ।

उनका अनुसार श्रेष्ठको व्यक्तिगत तथा मोहीयानी हकदार लौटन चौधरी, जोगीलाल चौधरी र महादेव चौधरीले सो जग्गा भोगचलन गर्दै आएका छन् ।

इलाका प्रहरी कार्यालय टीकापुरका प्रहरी नायब उपरिक्षक शिवबहादुर सिंहले सुकुम्बासी भन्दै बस्न आएकाहरूलाई व्यक्तिगत जग्गा अतिक्रमण गरी अवैधानिक रूपमा नबस्न अनुरोध गरी खाली गराएको जनाए ।

सुकुम्बासी भन्दै दैलेख, बाजुरा, अछाम र सुर्खेतबाट आएर जग्गा कब्जा गरी बसेका थिए ।