काठमाडौं –सांग्रिला डेभलपमेन्ट बैंक लिमिटेड स्थापनाको १४औं वर्ष पूरा गरी १५औं वर्षमा प्रवेश गरेको छ ।

बैंकले आफ्नो वार्षिकोत्सव रक्तदान कार्यक्रम गरी मनाएको छ । “रक्तदान–जीवनदान” भन्ने भावालाई मनन् गरी बैंकको केन्द्रीय कार्यालय बालुवाटार काठमाडौं, कलष्टर कार्यालयहरू, पोखरा र नेपालगञ्ज तथा शाखा कार्यालयहरू नारायणगढ र बुटवलमा नेपाल रेडक्रस सोसाइटीको सहयोगमा रक्तदान कार्यक्रम गरिएको बैंकले जनाएको छ ।

बैंकका ग्राहक, सञ्चालक, शेयरधनी, कर्मचारी, शुभचिन्तक तथा सर्वसाधारण सहितले गरेको रक्तदानबाट काठमाडौंमा ४५ प्वाइन्ट, कलष्टर कार्यालय पोखरामा १४२ प्वाइन्ट, नेपालगञ्जमा ८८ प्वाइन्ट, तथा शाखा कार्यालय नारायणगढमा २१ प्वाइन्ट, र बुटवलमा ३० प्वाइन्ट गरी कुल ३२६ प्वाइन्ट रगत संकलन भएको छ । सो रगत नेपाल रेडक्रस सोसाइटीको ब्लड बैंकलाई हस्तान्तरण गरिएको बैंकले जनाएको छ ।

मुलुकभर सातवटै प्रदेशमा गरी ६८ वटा शाखाबाट अत्याधुनिक बैंकिङ सेवा प्रदान गर्दै आइरहेको यस बैंकले १८ वटा ए.टी.एम. तथा ५ शाखाहरूबाट लकर सुविधा लगायत ६ वटा शाखा इकाइबाट लघुवित्त सेवा समेत प्रवाह गर्दै आइरहेको छ । बैंकले आगामी वर्षमा अझ सशक्त रूपमा ग्राहक सेवामा समर्पित हुने प्रतिवद्धता समेत जनाएको छ ।