सुर्खेत– कर्णाली प्रदेशसभाको दोश्रो अधिवेशन अर्थात बर्खे अधिवेशन आइतबार सम्पन्न भएको छ । बर्खे अधिवेशमा प्रदेशसभाका ४१ ओटा बैठक बसे । 

आइतवार सभामुख राजबहादुर शाहीले प्रदेश प्रमुख दुर्गाकेशर खनालले पठाएको पत्र पढेर संसद सत्र समापन भएको घोषणा गरेका हुन । त्यसअघि आइतवारै बसेको प्रदेश सभाको वैठकले प्रदेशसभाका पदाधिकारी तथा सदस्यहरु र सरकारका मुख्यमन्त्री तथा मन्त्रीहरुको सेवा सुविधा सम्वन्धभी व्यवस्थापन गर्न बनेका दुई विधेयकहरुलाई सर्वसम्मत पारित गरेको थियो ।

नेकपाकै सांसदद्वारा सरकारको चर्को आलोचना

प्रदेशसभाको अधिवेशनको अन्तिम बैठकमा तत्कालीन एमालेका संसदीय दलका नेता रहेका नेकपाका सांसद यामलाल कंडेल प्रतिपक्ष जस्ता देखिए । उनले आइतवारको वैठकमा सरकारको चर्को आलोचनासमेत गरे ।

सरकारविरुद्ध कडा रुपमा प्रस्तुत भएका नेता यामलाल कंडेलले सरकारका काम कारबाही गतिलो नभएको आरोप लगाए । ‘सरकारले बारम्बार आफ्नै कारणले अभिव्यक्ति बदलिरहनु पर्ने वा स्पष्टिकरण दिइरहनुपर्ने परम्परा बसालेको छ,’ उनले भने, ‘सरकारमा रहेका मन्त्रीहरुले यो शैली बदल्न जरुरी छ । यस्तो संस्कारले आगामी समृद्धिको यात्रामा गम्भीर धक्का लगाउने पक्का छ ।’

नेकपाको संसदीय दलका लागि उच्च दावेदार नेता कंडेलले आइतवार प्रदेश सभा बैठकमा पनि आफ्ना त्यस्तै इच्छा प्रकट गरे ।  ‘विगतमा काठमाडौंको इतिहास हेर्दा यहाँ एकै व्यीक्त मुख्यमन्त्री र संसदीय दलको नेता हुनैपर्छ भन्ने केही छैन,’ संसदीय दलको नेताको रुपमा घुमाउरो पारामा आफुलाई उभ्याउँदै उनले भने, ‘विगतको मान्यतालाई अंगिकार गर्दै संसदीय दल अघि बढनेछ ।’ 

उनले बाहिर संसदीय दलको नेताको बारेमा विभिन्न प्रचारवाजी गरिएको बताउँदै संसदीय दलमा हुने छलफलले मात्रै अर्थ राख्ने बताए । ‘मिडियामा संसदीय नेता चयनको विषयबारे व्यापक चर्चा गरिएको छ,’ उनले भने, ‘संसदीय दलको नेता चयन नभएका कारण मात्रै संसदले गति नपाएको होइन । सरकारले नै संसदलाई आवश्यक काम दिनुपर्छ ।’

उनले सरकारमा रहेकाहरुले मनलाग्दी गरिरहेको आरोप समेत लगाए । ‘कोही राजीनामा दिन्छु भन्दै बजारमा हिँड्ने गरेको मैले सुनें,’ उनले भने, ‘राजीनामा किन दिनुपर्ने भयो ? के समस्या भयो ? हामी आपसमा बसेर छलफल गर्न सक्छौं ।’  

सरकारको चर्को आलोचना गरेका कंडेलले आफूमा मुख्यमन्त्री हुने लालसा नभएको पनि बताउन भ्याए । ‘म मुख्यमन्त्री हुन खोजेको होइन,’ उनले भने, ‘हामीलाई जनताको चाहना कमोजिमको काम गर्नै पर्ने जिम्मा छ । केही व्यीक्तको  चाहना पूरा गर्नका लागि संसद बाध्य छैन ।’

स्रोतका अनुसार नेता कंडेल सरकारले ल्याएको सेवा सुविधा सम्वन्धी विधेयकमा रुष्ट देखिएका छन् । सरकारले संसद र मुख्यमन्त्री तथा मन्त्रीहरुको सेवा सुविधा तय गरेका कारण उनी रुष्ट बनेको स्रोतले बतायो । तर उनले यसअघि नै सरकारबाट गाडी लगायतका सुविधा भने लिइरहेका छन् ।

प्रदेश बलियो बनाऔंः नेता शाही

संसदमा प्रमुख प्रतिपक्ष दल नेपाली काँग्रेसका नेता जीवन बहादुर शाहीले कर्णाली प्रदेश बलियो भएमात्रै संसद, प्रतिपक्ष र सत्तापक्ष बलियो हुने धारणा राखे । उनले नेपाली काँग्रेसले सरकारलाई सजग बनाउन, सचेत बनाउन र क्रियाशील बनाई जनचाहना अनुरुप अघि बढ्न सदन अवरुद्ध गरेको बताए । ‘हामीले केही दिन सदन अवरुद्ध गरेका थियौं,’ उनले भने, ‘त्यो सदन अवरुद्ध गर्नुको कारण सरकारलाई निकम्मा बनाउन या असफल बनाउन होइन । त्यो हाम्रो कदम सरकारलाई सहयोग गर्ने गरी भएको हो । जनताका चाहना बमोजिम सरकार अघि बढोस कर्णालीको समृद्धिमा लागि परोस भन्नका लागि हामीले सदन अवरुद्ध गरेका हौं ।’

नेता शाहीले सरकारले संसदलाई महत्वपूर्ण रुपमा नलिएको आरोप लगाए । ‘सरकारले आजको जस्तो महत्वपूर्ण दिनको वेवास्ता गरेको छ ।’ मुख्यमन्त्री शाही सदनमा उपस्थित नभएको कुरालाई इंगित गर्दै कांग्रेस सांसद शाहीले भने, ‘सरकारले सदनलाई आमाको रुपमा लिनुपर्छ ।’ उनले कर्णाली प्रदेश बनाउन सबैमा मेलमिलाप हुन जरुरी रहेको बताए । ‘सबैको मेलमिलाप बिना कर्णालीको रुपान्तरण सम्भव नै छैन,’ नेता शाहीले भने, ‘शीरमा समझदारी, काँधमा जिम्मेवारी र हृदयमा इमान्दारी राखेर अघि बढौं हामीले चाहेको, हामीले देखेको जस्तो विकास सम्भव छ ।’

संसदमा राप्रपाका सांसद शोसीला शाहीले सबैले मिलेर मात्रै कर्णाली बन्ने बताइन् । ‘कर्णालीको विकासका लागि बैको सहकार्य जरुरी छ ।’ उनले भनिन, ‘राप्रपा त्यसका लागि तयार छ ।’