काठमाडौं –कांग्रेसमा सभापति शेरबहादुर देउवाविरुद्ध बृहत् मोर्चाबन्दीको गृहकार्य शुरू भएको छ । सभापति देउवाको कार्यशैलीविरुद्ध कांग्रेसका ७ प्रभावशाली नेताले बलियो मोर्चाबन्दीको गृहकार्य शुरू गरेका हुन् ।

पार्टीको बहुप्रतिक्षीत महासमिति बैठक आउन करीब एक महिना बाँकी छँदा सोमवार नेतृ सुजाता कोइरालाको निवास मण्डिखाटारमा लञ्च मिटिङ भएको छ ।

भेटमा नेतृ कोइरालाका अलावा वरिष्ठ नेता पौडेल, महामन्त्री शशांका कोइराला तथा नेताहरू प्रकाशमान सिंह, डा. शेखर कोइराला, डा. रामशरण महत र अर्जुननरसिंह केसी सहभागी थिए ।

नेता केसी अघिल्लो महाधिवेशनमा देउवा प्यानलबाट महामन्त्रीको उम्मेदवार बनेका थिए । तर पछिल्लो समय देउवासँग उनको सम्बन्ध चिसिएको छ ।

मोर्चाबन्दीमा कृष्ण सिटौलालाई पनि समेट्ने गृहकार्य भइरहेको छ ।

'यस बैठकका लागि नेता कृष्ण सिटौला पनि आउने कुरा थियो, कार्यव्यस्तताका कारण उहाँ आउन सक्नुभएन,' कांग्रेस स्रोतले भन्यो, 'सभापतिको कार्यशैलीविरुद्ध उहाँको पनि ऐकेबद्धता छ ।'

यसअघि सरेको कांग्रेस महासमिति बैठक आगामी मंसिर २८ गतेका लागि बोलाइएको छ ।

सत्ताधारी बलियो कम्युनिस्ट पार्टीसँग जुध्न सशक्त भूमिकाको खाँचो औंल्याउँदै नयाँ शिराबाट अघि बढ्ने गरी गृहकार्य भइरहेको स्रोतले बतायो ।

कांग्रेसमा नयाँ र बलियो गुट बनाउन अर्जुननरसिंह केसी निरन्तर सक्रिय छन् ।

अघिल्लो महाधिवेशनको पूर्वसन्ध्यामा गुट परिवर्तन गरेपनि अपेक्षित सफलता हात नलागेपछि केसीले नयाँ ढंगले रियलाइजेसन गरेको उनको निकट स्रोतले बतयो । सोही कारण उनले देउवाको साथ छाडेका छन् ।

यसलाई आसन्न महाधिवेशनको वार्मअपका रूपमा समेत हेरिएको छ ।

यसअघि कोइराला परिवारबाटै सभापतिको उम्मेदवार बनाउने गृहकार्य भइरहेको चर्चा थियो । सो गृहकार्यमा पौडेल, सिंह लगायतका प्रभावशाली नेता बाहिर थिए । भावी सभापतिका लागि यी दुवै नेताको छुट्टाछुट्टै दाबी थियो ।

सोमवार यी सबै नेता एकसाथ देखिनुलाई अर्थपूर्णरूपमा हेरिएको छ ।

बैठकमा सभापतिको कार्यशैली, आसन्न महासमिति बैठक, पार्टीको विधान लगायतका विषयमा कुराकानी भएको कांग्रेस स्रोतले जानकारी दियो ।