हिन्दू महिला तुलसी गाब्बार्ड अमेरिकाको राष्ट्रपति उम्मेदवार बन्न सक्ने

कात्तिक २७, २०७५

काठमाडौं — अमेरिकी कंग्रेसमा पहिलो हिन्दू सांसद तुलसी गाब्बार्ड सन् २०२० को राष्ट्रपति चुनाव लड्ने विचार गरिरहेकी छन् । 

लस एन्जेलसको मेडट्रनिक कन्फेरेन्समा शुक्रवार प्रतिष्ठित भारतीय अमेरिकी चिकित्सक सम्वत शिवांगीले तुलसी सन् २०२० मा अमेरिकाको राष्ट्रपति बन्न सक्ने बताए । उनको यो संक्षिप्त बयानपछि मानिसहरूले उभिएर तुलसीको अभिवादन गरे । 

डेमोक्रेटिक पार्टीबाट हवाईकी सांसद तुलसीले पनि सभालाई सम्बोधन गरिन् । उनले राष्ट्रपति चुनावमा लड्ने नलड्ने विषयलाई पुष्टि पनि गरिनन्, खण्डन पनि गरिनन् । क्रिसमसका बेलामा उनले यसको फैसला लिने मानिएको छ । 

हुन त त्यो पनि औपचारिक घोषणा हुने छैन र त्यसमाथि अर्को वर्ष फैसला हुनेछ । 

उनको टीमले सम्भावित डोनरहरूसँग सम्पर्क गरिरहेको बताइएको छ । उनी चुनावमा प्रभावशाली प्रचार गर्ने स्वयंसेवकको खोजीमा छिन् । 

तुलसीको जन्म हवाई राज्यका स्टेट सिनेटर तथा क्याथोलिक पिता अनि ककेसियन समुदायकी आमाबाट भएको हो । उनकी आमाले हिन्दू धर्म अपनाएकी हुन् । तुलसीले हवाईमै हुँदा किशोरावस्थामा हिन्दू धर्म अपनाइएकी थिइन् । 

उनी कथंकदाचित् राष्ट्रपति पदको उम्मेदवार भइहालिन् भने प्रमुख राजनीतिक दलको पहिलो हिन्दू उम्मेदवार हुनेछिन् । उनले चुनाव जितिन् भने सबभन्दा युवा र पहिलो महिला राष्ट्रपति हुनेछिन् । 

तुलसी गत साता मात्र हाउस अफ रिप्रेजेन्टेटिभ्समा चौथोपटक विजयी भएकी हुन् ।

एजेन्सी
 


ADVERTISEMENT

कात्तिक २७, २०७५ मा प्रकाशित

प्रतिक्रिया दिनुहोस