बुटवल – राष्ट्रिय जनमुक्ति पार्टीका उपमहासचिव टोप अस्लामीले वर्तमान सरकारप्रति आमनेपाली जनताले राखेको अपेक्षा धरासायी हुने हो कि भन्ने आशंका उत्पन्न भएको बताएका छन् ।

रिपोर्टर्स क्लब नेपाल ५ नम्बर प्रदेश समितिद्वारा मंगलवार बुटवलमा आयोजित शुभकामना आदानप्रदान कार्यक्रममा बोल्दै उपमहासचिव अस्लामीले दुईतिहाई बहुमतको सरकारबाट आमनेपाली जनताको जीवनस्तरमा आमूल परिवर्तनको अपेक्षा गरेकाले जनताको अपेक्षा पूरा गर्नेतर्फ सरकार दृढतापूर्वक अगाडि बढ्नुपर्नेमा जोड दिए ।

सरकारका काम कारवाही सन्तोषजनक रुपमा अगाडि बढ्न नसकेको भन्दै उनले यो वा त्यो बहानामा सरकार विकास निर्माणको महान् अभियानबाट विचलित भए दुईतिहाई बहुमत प्राप्त वर्तमान सरकारप्रति जनताको आशा र भरोसामा तुषारापात हुने विचार व्यक्त गरे ।

अबको दशक निर्माणको दशकको रुपमा लिनुपर्ने बताउँदै उनले सत्तापक्ष, प्रमुख प्रतिपक्षी दल लगायत सबै दलमा निर्माणवादी चिन्तनको विकास हुनुपर्ने आवश्यकता औल्याए ।

नयाँ प्रयोगको नाउमा पुरानै गल्ती दोहोर्याउँदै जानु खेदजनक रहेको भन्दै जनमुक्ति पार्टीका विदेश विभाग उपप्रमुख तथा जनमुक्ति एकेडेमीका उपप्रमुख समेत रहेका अस्लामीले निर्माणको अभियानमा आफ्नो पार्टी सरकारलाई सहयोग गर्न तयार रहेको बताए । नेपालको संविधान २०७२ ले मुलुकको विविधता र विशिष्ठतालाई आत्मसाथ गर्न नसकेको भन्दै उनले संविधानको पुनर्लेखन गर्नुपर्नेमा जोड दिए ।

नेपालको विविधताको व्यवस्थापनका लागि ५ कलस्टरको आधारमा ५ सदस्यीय राष्ट्रपति मण्डल गठन गर्नुपर्ने बताउँदै उपमहासचिव अस्लामीले भ्रष्टाचारीलाई देशद्रोही घोषणा गरी उसको सम्पत्ति राष्ट्रियकरण गर्ने संवैधानिक व्यवस्था गर्नुपर्ने माग आफ्नो पार्टीले अगाडि सारेको जानकारी गराए । भ्रष्ट्राचारजस्तो जघण्य अपराधलाई कुनै एक आयोगको भरमा मात्रै छाड्न नहुने उनको तर्क थियो ।