काठमाडौं — संसारमा अग्रणी बन्नका लागि चीनले लगातार नयाँ आविष्कार गरिरहेको छ । यसक्रममा उसले खतरनाक हतियार पनि प्रदर्शन गरिरहेको छ । 

चीनले नयाँ लेजर रक्षा हतियार प्रणाली प्रदर्शन गरेको छ । यसले हावामा निशाना लगाएर ड्रोन, बम र मोर्टारलाई ध्वस्त पार्न सक्छ । 

ग्लोबल टाइम्सका अनुसार, दक्षिणी गुआङदोङ प्रान्तको ज्युआई शहरमा आयोजित एयर शोमा नयाँ प्रणाली प्रदर्शन गरिएको हो । 

यो हतियार प्रणालीलाई चीनले भारतीय सीमासँग जोडिएको तिब्बतमा अनि दक्षिण चीन सागरको विवादित टापुमा तैनाथ गर्नसक्ने भनी भारत झस्किएको छ । यो प्रणालीको नाम एलडब्ल्यू ३० लेजर रक्षा हतियार प्रणाली हो । 

हतियार देशको सबभन्दा ठूलो क्षेप्यास्त्र निर्मातामध्ये एक चाइना एरोस्पेस सायन्स एन्ड इन्डस्ट्री कर्पोरेसनले विकसित गरेको हो । 

गत जुलाई महिनामा अमेरिकाका एक सैन्य अधिकारीले यसको खुलासा गर्दै सेप्टेम्बर २०१७ देखि अहिलेसम्म २० किसिमका घटनामा अमेरिकी विमानलाई तारो बनाउन लेजर हतियार प्रयोग गरिएको बताए । 

ती अधिकारीले नाम नखुलाउने शर्तमा लेजर किरणहरू अमेरिकी विमानमा फ्ल्याश गरिएको र त्यसमा चीनको हात रहेको अनुमान गरिएको बताए । प्रशान्त क्षेत्रमा प्रयोग गरिएका हतियार सैन्य प्रयोजनका लागि थिए कि व्यावसायिक
भन्ने कुरा पुष्टि भएको छैन तर त्यसले पाइलटलाई हानि गर्न सक्ने सम्भावना चाहिँ रहेको थियो ।

एजेन्सी